Arabako Campuseko Baratze Ekologikoa koordinatzen duten irakasleeek antolatzen dute balio ekologikoetan oinarritutako ortugintzaren inguruko ikastaroa, eta Kiribilore Permakultura elkarteak eskaintzen du. Izena emateko epea zabalik egongo da apirilaren 8ra arte, eta 30 euroko kostua izango du.

Hiriko nekazaritza ekologikoan interesa duten pertsona guztiei zuzenduta dago eskaintza, baina unibertsitate komunitateko kideek lehentasuna dutela zehaztu du EHUk ohar batean.

Ikastaroa Arabako Campuseko baratzean bertan eskainiko da, Gasteizen, Hezkuntza eta Kirol Fakultatearen ondoan. Sei saio izango dira guztira, 18 ordu, eta arratsaldez egingo dira. Euskaraz edota gaztelaniaz egin ahal da ikastaroa, asteko bi egun ezberdinetan emango da hizkuntzaren arabera.

Sasoiko ereintza eta landaketa, pertsonen eta lurraren zaintza, landare osasuna eta landare osagarriak izango dira jorratuko dituen edukietako batzuk, baina beste hainbat arlotara heldu nahi da, eta haziak, uraren kudeaketa, tokiko elikagaiak eta egungo tresnak ere aztergai izango ditu.

Zehaztu dute, bestalde, Arabako Campuseko ikasleentzat derrigorrezkoa dela lehen bost saio egitea, kreditu bat lortze aldera.

Izen-ematea www.hazicampusa.eus webgunean egin behar da, bertan eskuragarri dagoen formularioa betez.