Gurutzetako Unibertsitate Ospitaleak Joint Commision International (JCI) erakundearen ziurtagiria lortu du, «kalitate asistentziala, pazienteen segurtasunean oinarritzen diren edukiak, eta prozesu klinikoetako arriskuen murrizketa» bezalako faktoreak kontuan hartuz.

Osakidetzak nabarmendu du «tamaina eta ezaugarri horiek dituzten ospitaleetatik» Gurutzetakoa dela ziurtagiria lortzen duen Estatuko lehen ospitale publiko orokorra.

Lakuako Osasun Saileko arduradunen hitzetan, «lorpenak erakusten du ospitaleak nazioarteko irizpide zorrotzak betetzen dituela; halaber, pazienteei ematen dien arreta hobetzeko duen etengabeko konpromisoaren erakusgarri da, eta horri esker osasun-arretaren abangoardian kokatu da osasun-zentroa».

«Pazienteen segurtasuna eta kalitate asistentzialaren hobekuntza ziurtatzen dituen munduko erakunderik garrantzitsuena da JCI, eta erakunde horretako auditore adituen lantalde batek ebaluatu du ia 1.400 kalitate-estandar betetzen direla», azaldu dute.

Aztertzen diren parametroak

Osakidetzatik erantsi dute, halaber, «zerbitzuak eta asistentzia kudeatzeaz» gain hurrengo parametroak aztertzen dituela: «pazienteak behar bezala identifikatzea; komunikazio eraginkorra izatea haiekin; arrisku handiko medikazioaren segurtasuna; osasun-arretari lotutako infekzioen arriskua murriztea; eta erorketek eragindako lesioak izateko arriskua murriztea», pazienteen segurtasunarekin lotuta dauden nazioarteko helburuak direnak.

Osasun Sailak azpimarratu du mugarria lortzeko ezinbestekoa izan dela «talde-lana, eta horretan parte hartu dute erakundeko profesional guztiek, zeinek esfortzu izugarria egin baitute pazienteen segurtasuna eta haienganako arreta hobetzeko estrategiak garatu eta ezartzeko».

Joint Commission Internationalek ziurtatutako Osakidetzako beste zentro bat dago 2016tik,  Debagoieneko ESIko Debagoieneko Ospitalea.