Lakua-Arriagako gazteak kanpaina bat garatzen ari dira, eta horren amaieran, gida-mapa bat egingo dute, bainu publikoak eta komun ‘lagunkoiak’ bilduko dituena, hau da, herritarren erabil ditzaketen establezimenduetako komunak.

Ekimena ‘Vitoria-Gasteiz Hobetuz’ programaren gazte-atalaren parte da, herritarren artean sortutako proposamenen bidez hiria hobetzeko. Guztira, 200.000 euro ditu gazteek bultzatutako ekimenak gauzatzeko, azaldu du Udalak ohar baten bidez.

Kanpainaren aurkezpenean, Miren Fernandez de Landa Gobernu Irekiko eta Gizarte Etxeetako zinegotzia, Ixone Perez, Eider Moraga eta Silvia Fernandez izan dira, azken hirurak Mendebaldea Institutuko GEOko 4. mailako ikastaroaren bozeramaile gisa. Hemendik aurrera, auzoko establezimenduetatik atez ate joaango dira, ekimenarekin bat egitera animatzeko.

Helburua da urtarrilaren amaieran auzoan dauden komun publikoen mapa-gida bat aurkeztea (batzuetan herritarrek ez dituzte ezagutzen), eta, batez ere, bainu ‘lagunkoien’ mapa bat, jendeari doan eta interesik gabe ateak ireki dituztenak, behar izanez gero erabili ahal izateko.

Proiektuaren bultzatzaileak laster hasiko dira auzoan bainu ‘lagunkoiak’ zer diren azaltzen, eta establezimenduetan, dendetan eta lokaletan komunak dituztenak konbentzitzen saiatuko dira kontzeptu horrekin bat egin dezaten.

Horretarako, bideo labur batzuk prestatu dira sare sozialetan zabaltzeko. Horietan, auzoko pertsonak eta merkatariak elkarrizketatu dira, haien ikuspuntua ezagutzeko. Informazio-liburuxka bat ere egin dute, establezimenduetan banatuko dena, eta baita itsasgarri batzuk ere, erakusleihoetan edo ateetan jartzeko.