Imanol Lertxundi Kaltzakorta, ‘Porru’, 68 urteko militante abertzalea eta ezkertiarra, 1995eko otsailaren 9an hil zen bihotzekoak jota, Ondarroan, Amnistiaren Aldeko Batzordeetako bi kideren atxiloketaren aurkako protesta batean parte hartu ondoren. Ertzaintzak karga bat egin zuen manifestazioan zehar. 

Lakuako Segurtasun Sailak emandako bertsio ofizialak ukatu egin zuen Lertxundi Ertzaintzako ezein agentek jo zuenik, eta ziurtatu zuen hildakoa «Ondarroako ertzain-etxeko arduradunarekin hitz egiten ari zela, eta ez bi pertsonen atxiloketagatik protesta egiten ari zen kontaktu-lerroan», Saileko bozeramaile baten arabera. 

Amnistiaren Aldeko Batzordeek ohar baten bidez adierazi zutenez, Lertxundi «jipoitu» egin zuen Ertzaintzak, agenteak auto batean erakundeko bi kide identifikatzen saiatzen ari zirenean, bihotzekoa izan eta anbulatoriora eraman aurretik. Ondarroako herritarrek bat egin zuten ezker abertzaleak Lertxundiren heriotza salatzeko hurrengo egunean deitutako grebarekin. 

Lakuako Gobernuko Segurtasun sailburu Juan Maria Atutxak adierazi zuen sektore batzuek «hildako bat alokatuko zutela errentagarritasuna ateratzeko». Atutxak horrela erantzun zien Amnistiaren Aldeko Batzordeei eta Herri Batasunari, Ertzaintzari egotzi baitzioten heriotzaren erantzukizuna.