Amurrion eginiko ekitaldi politiko batean, azken egunotan Mariano Rajoy Gobernu espainoleko presidenteak alderdi desberdinetako buruzagiekin egin dituen eta egin asmo dituen bilerak izan ditu hizpide Ortuzarrek.
«Han egon dira Pedro Sanchez, Albert Rivera, Pablo Iglesias eta ez dakit zenbat jende gehiago. Gu ez. Espainiako batasuna da beraien helburu bakarra. Hori eta Kataluniari eta Euskadiri dagokigun erabakitzeko eskubidea debekatzea», esan du EBBko presidenteak, eta gaineratu «horretarako gurekin jai» daukatela.
«Aberri bat gara, eta gure etorkizuna gure esku egon behar da», nabarmendu du.
Ortuzarren esanetan, «Madrilera goazen bakoitzean, ez goaz Espainiako interesak eta batasuna defendatzera; Euskadiren interesak eta gure seme-alaben etorkizuna defenditzera goaz».