ELENeko presidente Ferran Suayk eta presidenteorde eta Kontseiluko idazkari nagusi Paul Bilbaok Hizkuntza Eskubideak Bermatzeko Protokoloaren ale bat eman diote eskura Valentziako Gorteetako presidenteari gaur eguerdian Gorteen egoitza nagusian ELENeko zuzendaritzari egin zaion harrera-ekitaldian. «Kontseilua sorrera-fasetik izan da ELENeko kide, benetan sinisten dugulako gizarte eragileok saretu egin behar dugula Europaren aurrean indartsu izan nahi badugu» esan du Paul Bilbaok.

ELEN erakundea da Hizkuntza Eskubideak Bermatzeko Protokoloaren etorkizuna gidatzen duen Jarraipen Batzordeko kide Linguapax, Ciemen, UNPO, ECMI, PEN eta Kontseiluarekin batera. «Protokoloak berak ezarri zuen zein den lehen Jarraipen Batzordearen osaera, eta erakunde horiekin batera ari gara proiektuaren etorkizuneko lan-ildoak zehazten» gaineratu du Kontseiluko ordezkariak.

Europa osoko hizkuntza gutxituen berreskurapenaren alde lan egiten duten gizarte eragileen bilgunea da ELEN, eta bihar egingo duten zuzendaritza-batzordean, besteak beste, Protokoloaren etorkizuneko lan-ildoak nola jorratu aztertuko dute.

Honez gero, Gasteizko, Nafarroako eta Galiziako Parlamentuetako lehendakariei zuzenean eman zaie Protokoloaren ale bana, eta Europako Parlamentuko zein Europako Kontseiluko hainbat arduradunekin ere partekatu da Protokoloaren etorkizuneko proiekzioa. «Europa mailan hizkuntza-politiken eremuan inoizko babes zein adostasun handieneko dokumentua da Protokoloa, eta hori baliatu behar dugu. Euskal Herrian ere ez dago horrenbesteko adostasunik duen hizkuntza-politikari buruzko dokumenturik, eta horren adibide da aurreko astean euskal gehiengo sindikalak ere bat egin izana» gaineratu du Bilbaok.

Gaurko harrera-ekitaldiaz gain eta ELENen bileraz gain, Kontseiluko idazkari nagusiak gaur arratsaldean Protokoloaren aurkezpena egingo du Accio Cultural del Pais Valencia erakundeak antolatutako ekitaldian.