«Ezin dugu gorrotoak eta mendekuak legalitatea eta demokrazia ordezka dezaten utzi. Eta Ibon Iparragirrerena horren adibide garbia da», salatu du Iruñerriko Sarek ohar baten bitartez. Gogora ekarri dute Iparragirreren «egoera larria» eta, espetxean egotea gutxi balitz, «berarekin batera bere senide eta lagunak zigortzen dituen urruntze politika» ere aplikatzen zaiola.

Egoera hau «mendekua» bilatzen duen politika baten ondorio dela azpimarratu dute. Honen aurrean, «giza eskubideak errespetatzea» eskatu dute.

Iparragirrek kalean beharko lukeela azaldu dute. «Egun desarmatua dagoen erakunde bateko kide izatea leporatuta dago preso Ibon Iparragirre, beraz, ez dago berrerortze aukerarik. Bai espainiar Kode Penalak zein Espetxe Arautegiak aurreikusten dituzte hainbat artikulu Ibon eta gaixo larri eta sendaezinak dituzten gainontzeko presoen egoera krudelari amaiera emateko».

Iparragirrerentzako «tratamendu duina» eskatu dute, eta tratamendu horrek etxean behako lukeela azpimarratu.

Egoera salatu eta bere etxeratzea zein gaixo dauden gainontzeko euskal preso politikoena aldarrikatzeko, ostiralean, azaroak 10, 19:00etan, giza-kate ibiltaria egingo dute Iruñeko kaleetatik, Santo Domingo aldapatik abiatuta.