![](/media/asset_publics/resources/000/456/086/article_main_landscape/1218_kul_prentsa.jpg)
Bertsotan esanak zituzten esan beharreko guztiak eta taularen atzeko aldean paratutako agertokira sartzea kosta zitzaien bertsolariei saioa amaitu eta segidan. Erabat hustuta iritsi ziren eta hitza hartu aurretik ere euren aurpegiek erakusten zuten barruan zekarten gorputzaldia, nekea eta talantea.
Maialen Lujanbiori so begirada guztiak, eta «bidearen neke eta betetasunetik» mintzatu zen hernaniarra. «Txapel hau lan gogor baten emaitza da», aitortu zuen. Plaza izugarri eder topatu zuela aipatu zuen, «jendea bero dena emateko».
Aitor Mendiluzek «oso mimatua» sentitu zela aipatu zuen indibidualki nahiz taldeari dagokionez: «Oso gurean aritzeko baldintza guztiak izan ditugu».
Unai Agirre estreinakoz zen finalean eta halako jendetzaren aurrean jartzea kostatu zitzaiola adierazi zuen: «Oso polita eta gogorra izan da». Bere lanagatik ez ezik, bertso eskolako lagunenarekin ere pozarren agertu zen. «Beraiek izugarri poztuko ziren baina igual ni adina ez», esan zuen Lujanbio eta Mendiluzeri keinua botaz.
Beñat Gaztelumendik ez zuela bere egunik hoberena izan nabarmendu zuen, «baina gaztea naiz eta ikasteko lagun onak ditut», bota zien irribarretsu ingurukoei.
Amets Arzallusek ere pareko sentsazioak zituen. Atzo hasi eta atzo amaitu zuen txapelketak «sentsazio gazi-gozoak» utzi dizkio, bere esanetan. «Egunean zehar ariketa batzuetan ustez egin nezakeenera ez naiz iritsi», zioen, «talde giroa» nabarmentzearekin batera.
Sustrai Colinak orain lau urte baino sentsazio hobeak izan zituela nabarmendu zuen eta zera gaineratu: «Igor Elortzarekin txapelketan azken ofizioa egin zuena ni izango naiz eta hori gauza handia da niretzat», esanaz amaitu zuen.
Izan ere, Unai Sarriegi eta Igor Elortza izan ziren agerraldiaren beste protagonistak, taularen gainean azken txapelketa zutela iragarri baitzuten biek. Sarriegik erabaki hau hartzeko «toki hoberik» ez dela izango nabarmendu zuen eta «zapore gozoz» agurtzen duela txapelketa aipatu zuen. «Bukaerako argazki hori ez dut sekula ahaztuko», esanaz agurtu zen. Elortzak arrazoi pertsonal eta kolektiboak aipatu zituen. Azken alor honetan, gogora ekarri zituen badirela atzetik bultzaka datozenak.
Iñaki Murua Bertsozale Elkarteko lehendakariak finalaren maila goraipatu eta txapelketaren antolaketan parte hartu duten guztiei bere txindurri lana eskertu nahi izan zien, eta umoretsu bota zuen bera ere ez dela datorren txapelketarako sailkatuko.
![Euskara-saria](/media/asset_publics/resources/001/148/691/article_thumb_horizontal/euskara-saria.jpg)
Hau Pittu Hau konpartsaren Euskara Saria jaso du Presoen Euskara Irakasle Taldeak
![Itunougarte](/media/asset_publics/resources/001/148/694/article_thumb_horizontal/itunougarte.jpg)
«Gustura onartu dut erronka; hori ere badelako, ordainsariak dituen erronka bat»
![Mani](/media/asset_publics/resources/001/149/003/article_thumb_horizontal/mani.jpg)
Bilbo reivindica en ambiente festivo que la vuelta a casa de los presos sea una realidad
![Captura_de_pantalla_2024-08-25_a_las_14.19.11](/media/asset_publics/resources/001/149/394/article_thumb_horizontal/Captura_de_pantalla_2024-08-25_a_las_14.19.11.png)