Enplegu Ministerio espainiarrak kaleratutako datuek adierazten dutenez, 3.286 langabe gutxiago utzi ditu maiatzak Hego Euskal Herrian.
Jaitsierarik nabarmenena Nafarroan eman da, apirilean baino 1.183 langabe gutxiago zenbatu baitituzte maiatzean (%3,43) gutxiago. Orotara, 33.336 pertsona daude herrialde honetako enplegu bulegoetan izena emanda, duela urtebete baino 3.437 gutxiago (%9,35 gutxiago).
Bizkaian, %1,97koa izan da jaitsiera maiatzean, 1.419 pertsona gutxiago ari baitziren lan bila. Iazko hilabete berarekin alderatuta, jaitsiera %8,12a izan da (6.232 pertsona).
Araban, %1,36koa izan da jaitsiera, 275 lagun atera baitira enplegua bilatzeko zerrendetatik. Iazko zenbakiekin konparatuz gero, tasak %7,91 egin du behera (1.709 lagun).
Gipuzkoan, aldiz, aurreko hilabetean baino 409 lagun gutxiago zeuden enplegu bulegoetan izena emanda, hau da, %1,25 gutxiago. Iazko datuak ikusita, jaitsiera %9,75ekoa izan da (3.494 pertsona).
Guztira, 156.137 lagun zeuden maiatzaren bukaeran Hego Euskal Herriko enplegu bulegoetan izena emanda.
Estatu espainiarrean, %2,5 egin du behera langabezia erregistratuak maiatzean (83.738 pertsona). Guztira, 3.252.130 langabe daude.