Eskuinaren feudo historikoa izan den Urruñan Filipe Aramendi izanen da ondorengo auzapez. «Lehen hautetsi abertzalea izan zen Daniele Albizu anderea izan nahi dut gogoan une honetan», aitortu dio NAIZi.

Zerrenda ireki batean hautatua izan zara.
Hala da, ni abertzalea naiz baina nire ondoan gehienbat herriko hainbat dinamikatan inbestitu diren herritarrak ditut. Hala ere, gure herrian orri bat pasa den honetan gogoan izan nahi ditut 1983az geroztik garai zinez zailetan bidea erakutsi ziguten abertzaleak. Gogoan dut Daniele Albizu emazte euskaltzale eta lehen hautetsi abertzalea izan zena Urruñan. Nola ahantzi pairatu behar izan zuena emazte eta euskaltzale gisa Poulou auzapeza zenean! Hala ere, oraingoan, garai berriei eta herriaren bilakaerari erantzuteko zerrenda anitza eratu dugu. Horrek azaltzen du gure garaipena baita herriak zuen aldaketa nahikeria.

Zein egitasmo hobetsiko dituzue?
Ene ustez pairatu dugun pandemiak maleruski balio izan du agertzeko oraindik ere era azkarrago batean gure proposamenak egokiak direla. Adibide batzuk emateko: gure programan lehen proiektua barazkigune bat egitea zen, elikagai burujabetzaren bidean zirkuitu laburrak hedatzeko. Bigarrena, herrian elkartasun sarea azkartzea zen. Bi behar horiek finkatu genituen eta krisia etorri delarik, eta konfinamendua, herritarrek ulertu dute hori dela bidea geroari begira. Bi zutabe horiek ditu gure taldeak: trantsizio ekologikoa eta soziala. Norabide berri horretan urratsak emanen ditugu, herritarren eskutik.

Elkarlana ezberdinen artean. Lan moldeak emaitzak utzi zituen igandean, bereziki Lapurdin.
Hala da, abertzaleak eta beraiekin batera aldaketak sustatu nahi dituzten bertze herritarrak elkarlanean ari dira eta hori izan da garaipenaren klabea. Aitzina goaz.

Hego Lapurdin eragin azkarra izanen dute EH Baik sostengaturiko hautagaitzek.

Elkarlanak emaitza eman du are gehiago Hego Lapurdin. Biriatu, Ziburu, Hendaia, Senperen.. era batean edo bestean gure zerrendek herriko etxeetan ardurak izanen dituzte. Handik aurrera, nik auzolanerako aukerak ikusten ditut bertze hainbat herritan ere. Segur naiz Sara (Laborde) edo Ainhoako (Ibarluzea) hainbat hautetsirekin egitasmoak ahal ditugula bultzatu.

Eskualdeak eragin azkarra badu Euskal Elkargoan.
Euskal Elkargoak nahi ditu berriz ere lurralde poloak bultzatu, beraz guk Hego Lapurdin pisu handia hartuko dugunez gure eragina azkartuko da erakunde horretan ere.

10.000 biztanle baino gehiago dituen herri baten auzapez izanen zara. Abertzale batek inoiz gobernatu duen herri populaziorik handiena. Erronka handia bada.
Konpromiso handia sentitzen dut, baita pisu bat ere. Izan ere, gure lan ekipa prestatu dugu zehazki horretarako, hain zuzen gure herriak egin duen bilakaerari erantzun aproposak emateko. Erronka handia da baina desafio hori altxatzeko prest gira.