Erabaki hori hartu da, ezaugarri eta adin desberdinetako pertsonen artean kasu positiboen hazkundeagatik herriko bizilagunek duten kezka saihesteko. Horren ondorioz, Nafarroako Gobernuak hainbat neurritako foru agindu bat onetsi zuen. Hala, asteburu honetan PCR probak egingo dizkiete herri horretan bizi diren 15 urtetik gorakoei, 2.500 pertsona ingururi.

Udalak nabarmendu du pandemia hasi zenetik «arduraz eta elkartasunez» jokatu dela eta Herritarrentzako Laguntza Sarea bezalako ekimenak hartu direla baserrietako produktuak etxeetara banatzeko, desinfektatzeko edo herritarrei informazioa emateko irrati libreen eta bideoen bidez.

«Itxialditik kanpo ere, ardura nagusi izan da orokorrean gure herrian. Honela, udan zehar ere, gustuko ez diren hainbat erabaki hartu behar izan zituen Udalak, hala nola, San Juan bezperako jaia eta herriko jaiak bertan behera uztea eta udako igerilekua ez irekitzea. Horretaz gain, parke eta kaleetako desinfekzioekin jarraitu dugu, zerbitzu publikoetan langileentzat eta herritarrentzat neurri zorrotzak jarraitu ditugu, eta Udalaren komunikazio kanaletatik herritarrak momentu oro informatzen aritu gara, egon diren aldaketak nahiz Osasun Etxeko oharrak eta irizpideak zabalduz», agertu du.

Neurri horiek hartuta ere, Udalak jakinarazi du koronabirusak «indarrez» jo duela Leitza azken asteetan, eta horrek neurri berriak hartzera eraman du, besteak beste, kiroldegiko kirol kolektiboen eskaintza ezabatzea, programatutako ekintzak bertan behera uztea eta gune publikoetako aforoak 18 pertsonara murriztea.