Gipuzkoako Liburu-saltzaileen Gremioak banatzen dituen Zilarrezko Euskadi Sariek jada badituzte jabeak: elkarteak Amets Arzallus eta Ibrahima Baldek lau eskutara osatutako ‘Miñan’ (Susa) eleberri autografikoa eta Eshkol Nevoren ‘Tres pisos’ (Duomo) nobela saritu dituzte.

Euskarazko sariaren inguruan, elkartetik balioa eman diote «berriak hain modu bizkor eta arinean iristen zaizkigun garai hauetan, modu geldian eta adeitasun handiz» azaltzen dituztela Amets Arzalluz eta Ibrahima Baldek etorkinek bizitzen duten errealitate gordina. ‘Miñan’-ek Ibrahima Baldek jaioterri duen Ginea utzi eta anaia gaztearen bila Europaraino egindako ibilbide gatazkatsua jasotzen du. Baldek kontatutakoa Arzallusek eraman zuen paperera, euskaraz. Elkarrizketa honetan kontatu zion GARAri esperientzia hark utzi diona. Elkartearen hitzetan, «beharrezkoa da guztiz horrelako testigantzak irakurtzea gizarte bezala hobetu ahal izateko. Gure errealitate pribilegiatuetatik atera eta gugandik hain gertu daudenak ezagutu behar ditugulako da hain garrantzitsua ‘Miñan’-en kontatzen digutena», jarri dute azpimarra. Era berean, Arzallusek Balderen hitzen eta esperientzien «indarra eta gogorkeria» islatzeko baliatu duen modu guztiz adeitsua» ere goraipatu dute.

Gaztelerazko sariari dagokionez, Eshkol Nevoren ‘Tres pisos’ saritu dute, idazle israeldarraren «literaturak duen freskotasunagatik; inkomunikazioaren trinitate perfektua osatzen duten hiru kontakizunetan emandako eleberria da, egungo komunikazioaren gizartearen paradigma kontraesankorra», nabarmendu dute. Hiru istorio horien bidez autoreak «Israelen duela gutxiko historia zirriborratzen» duela iritzi dute, «horren berezia eta unibertsala den gizarte baten esparrua osatzen duten gatazkak, traumak eta sekretuak adieraziko –edo, hobe esanda, aitortuko– dituzten pertsonaien bitartez». Nevoren estilo «zuzen eta soila» ere nabarmendu dute.

Zilarrezko Euskadi Sariak tradizionalki Liburuaren Egunaren ospakizunaren harira eman ohi dira baina aurten, pandemiaren eraginez, ezin izan ziren apirileko hitzordu horretan banatu, ezta Literaktum jaialdiaren baitan ere, hau ere bertan behera geratu baitzen.