Sendagaien Europako Agentziak (EMA) Johnson & Johnsonen filiala den Janssen farmazia enpresaren eskaera ofiziala jaso du astearte honetan, Europako Batzordeak  covid-19aren aurkako bere txertoa baldintzapean erabiltzeko baimena emateko aukera azter dezan.

Europako arautzaileak jakinarazi duenez, eskaera hori «egutegi azkar baten arabera» aztertuko du, abenduan hasi baitzen denbora errealean aztertzen SARS-CoV-2ren aurkako Janssen txertoaren eraginkortasuna, segurtasuna eta kalitatea,lana aurreratzeko.

Orain, «txertoaren eraginkortasunari eta segurtasunari buruzko datu gehigarriak» aztertzen ari da Europako erakundea. EMAk ondorioztatzen badu txertoaren onurak bere arriskuak baino handiagoak direla, baldintzapeko baimena ematea gomendatuko du. Europako Batzordeak «egun gutxi barru» EBko eta EEEko (Europako Esparru Ekonomikoa) estatu kide guztietan baliozkoa izango den erabakia emango du orduan.

Giza Sendagaien Batzordeak (CHMP) antidoto horren datu guztiak «martxoaren erdialdean» aztertzea espero du, betiere enpresak aurkeztutako informazioa «nahikoa, osoa eta sendoa» bada.

Janssenen eskaerarekin, lau dira EMAk 2020. urtearen hasieran pandemia piztu zenetik jaso dituen baldintzapeko lizentziaren eskaerak. Beste hirurek abenduaren 21ean (Pfizer), urtarrilaren 6an (Moderna) eta urtarrilaren 29an (AstraZeneca) lortu zuten baldintzapeko baimena, eta dagoeneko erabiltzen ari dira EBko txertaketa-kanpainetan.

EMAk adierazi duenez, farmazia enpresa horiek konpromisoa hartu dute datozen urteetan egin dituzten saiakuntza klinikoen datuak aztertzen jarraitzeko eta Europako herrialdeetan txertaketa-kanpainak zaintzeko, bigarren mailako edozein efektu berri hautemateko.

Halaber, hilaren 10ean, EMAk covid-19aren aurkako txertoak garatzen dituzten guztiei eskatu zien iker dezatela ea beren antidotoek babes nahikoa eskain dezaketen SARS-CoV-2ren mutazio berrien aurka, Erresuma Batuan, Hegoafrikan eta Brasilen antzemandakoen aurka, esaterako.