NAIZ

Presoak txertaketarako lehentasuneko taldeetan sartzeko eskatu du Etxeratek

«Minutu bakar bat ere galdu gabe», presoak covid-19aren kontako txertaketarako lehentasuneko taldeetan sar ditzatela eta espetxeetako populazio guztiarentzat txertaketa plan «eraginkorrak» abian jar ditzatela eskatu die Etxeratek Lakua eta Nafarroako gobernuei eta espainiar zein frantziar estatuei.

Movilización de la dinámica SOS Presoak Covid-19 en Iruñea. (Iñigo URIZ/FOKU)
Movilización de la dinámica SOS Presoak Covid-19 en Iruñea. (Iñigo URIZ/FOKU)

Ohar baten bitartez, Etxerat elkarteak bat egin du «pertsona presoen osasunarekin eta defentsarekin zerikusia duten erakundeen gomendioekin» eta, hortaz, Lakuako eta Nafarroako gobernuetako Osasun sailei eta Osasun Ministerio frantziar zein espainiarrari dei egin die «minutu bakar bat ere galdu gabe, sar ditzaten presoak covid-19aren kontrako txertaketarako lehentasuneko taldeetan eta abian jar ditzaten espetxeetako populazio guztiarentzat txertaketa plan eraginkorrak eta bermea dutenak».

«Pertsona guztiek dute eskubidea beren osasuna sustatua eta babestua izan dadin, eta handiagoa da preso diren pertsonen osasunarekiko erakunde publikoek duten ardura. Izan ere, espetxe erakundeen instalazio publikoen barnean, espetxeetan, kolektiboki giltzaperatuak daude eta mugatuak dituzte mugimenduak», nabarmendu du elkarteak.

Nolanahi ere, aipatu eskaera egiteak ez du esan nahi, Etxeraten ustetan, «espetxeen barneko bizi-baldintzak hobetzera eta presoen segurtasuna ziurtatzera zuzendutako beste neurri batzuk hartu behar ez direnik, hala nola, kopuruz eta kalitatez egokiak diren musukoak eta beste osasun bitarteko batzuk banatzea».

Parot eta larriki gaixo daudenak

«Eta, jakina, nazioarteko erakundeen gomendioak berriro azpimarratzen ditugu: preso adinduak eta gaixotasun larriak dituztenak askatzea, hala nola, Ion Kepa Parot, Muret-eko presoa, covid-19an positibo eman duena, eta gaixotasun larri eta sendaezinak dituzten 17 euskal presoak ere bai», gaineratu dute.

Etxeratek adierazi duenez, espainiar eta frantziar estatuetan covid-19aren kudeaketa «espetxeen barnean espetxe gehiago eraikitzera zuzendu da; euskal presoen kasuan, neurri horiek presoei berei ez ezik, haien senitartekoei ere eragin diete, bisitak egin ahal izateko ibilaldi luzeak egin behar izan baitituzte. Gainera, hainbat hilabetetan gelditu egin dira egitekoak ziren hurbiltzeak, eta horrek handitu egin ditu senitartekoen sufrikarioa eta ziurtasunik eza, eta euskal presoena berena ere bai».

Elkarteak azpimarratu du kartzeletako populazioa «arrisku handikoen parametroen barnean» dagoela. Izan ere, «erabilera komuneko espazio oso txikiak partekatzen dituzte eta horrek kutsatze faktoreak biderkatzen ditu». Honen aurrean «neurri oso hertsitzaileak» baino hartu ez direla txarretsi du Etxeratek: «Neurri horiek eragin handia izan dute presoen osasun mental eta fisikoan, eguneroko bizitzarako hertsapenei loturik doan zaurgarritasuna dela eta» .

Horregatik guztiagatik Etxeratek eskatu du egin dezatela «berehalako plangintza bat espetxeetako populazioa lehentasunez txertatzeko, jakin baitakigu eta txertaketak, neurri batean behintzat, onura ekar diezaiokeela presoen osasun mental eta fisikoari, ez bakarrik covid-19tik babesten dituelako, baizik baita ere pertsona horien bizi-baldintza orokorrak oso hobegarriak direlako eta beste patologietan ondorio positiboak izan ditzakeelako».