Osasun-ziurtagiriaren eta Frantziako Gobernuak pandemiaren olatu berria geldiarazteko hartutako neurrien aurkariek laugarren larunbatez jarraian hartu dituzte kaleak, eta dozenaka mila pertsonak egin dute protesta.

Azken protesta horren aurretik, Konstituzio Kontseiluak ostegunean osasun-ziurtagiria tabernetan, jatetxeetan edo ospitaleetan sartzeko edo distantzia luzeko barne-bidaietarako beharrezkoa izateari oniritzia eman zion.

Uztailaren 21etik, txertaketa-pauta osoa duela edo kutsatuta ez dagoela ziurtatzen duen dokumentu hori derrigorrezkoa zen kultur etxeetan sartzeko, baina astelehen honetatik, abuztuaren 9tik, haren eskakizunak askoz ere gehiago markatuko du herritarren egunerokotasuna. Baliozkotutako lege-proiektuak, halaber, gehienez ere urriaren 15erako erabat txertatuta egotea eskatzen die osasun-langileei.

150 hirik manifestazioak egin dituzte eta Parisen lau izan dira. Frantziako Barne Ministerioaren datuen arabera, 204.000 pertsonak baino gehiagok parte hartu zuten manifestazioetan aurreko larunbatean, uztailak 31.

«Beste erremediorik ez badut ere, eskatzen duten denda guztiei boikota egingo diet. Sortzailea naiz, azoketara eta merkatuetara joaten naiz eta zenbait jarduera ezingo ditut egin. Ekonomikoki zaila izango da, baina arrisku hori onartuko dut» azaldu du Parisko protesta batean parte hartu duen Mariek.

«Herritar arduratsuak gara, gure oinarrizko eskubideen eta askatasunen defentsan erabat konprometituak. Batuta eta etiketa politikorik gabe gaude», adierazi du gaur Sophie Tissier 'Paris pour la Liberte' kolektiboko kideak.

Macronek sendo jarraitzen du

Macron oporretan dago ofizialki Bregançoneko udako egoitza ofizialean, herrialdearen hegoaldean, baina aste honetan nonahi egon da sareetan eta hedabideetan. Paris Matchen egindako elkarrizketa batean argi utzi du ez duela atzera egingo.

«Neurri murriztaile guztiak Konstituzio Kontseiluak balioztatu ditu. Krisian zehar kontrol parlamentarioak izan dituen herrialde bakarra gara. Eta diktaduraz hitz egiten da? Serioak izan gaitezen!», zioen astekari hartan.