Joe Biden Ameriketako Estatu Batuetako presidenteak Gobernu federaleko langile guztien (2,1 milioi pertsona) covid-19aren aurkako derrigorrezko txertaketa iragarriko du gaur arratsaldean, Estatu Batuetako hedabideek aurreratu dutenez. Etxe Zuritik hitzaldia emango du Bidenek erabakia jakinarazteko 17.00etan (21.00etan Euskal Herrian).

Bere mintzaldian, agintariak bere asmoak adieraziko ditu herrialdean Delta aldaeraren aurrerapena geldiarazteko eta populazioaren arteko immunitatea indartzeko txertoaren hirugarren dosia emateko estrategiari eusteko.

Horrela bada, Bidenek langile federalen gaineko eskakizunak indartuko ditu; orain arte txertoa ez hartzeko aukera zuten, baldin eta covid-19 probak egiten bazituzten modu erregularrean. Gainera, baldintza bera eskatuko die Gobernu federalarekin lan egiten duten kontratistei, eta enpresa pribatuak presionatuko ditu gauza bera egin dezaten.

Abuztuaren amaieran, Defentsa Sailak soldadu guztiei txertoa jartzeko agindu zuen, bai jardunean bai erreserban daudenei, Estatu Batuetako populazioaren artean txertaketa areagotzeko bultzada gisa. Estatu Batuetako biztanleen %53,3k covid-19aren aurkako txertoen pauta osoa jaso du, 12 urtetik gorakoen %62,4k barne, Gaixotasunak Kontrolatzeko eta Prebenitzeko Zentroen arabera (CDC, ingelesez).

Hala ere, eskualdeka banaketa oso desberdina da eta bereziki kezkagarria da Estatu Batuetako hegoaldean, Alabama, Luisiana edo Mississippi estatuetan, txertaketa maila askoz txikiagoa baita.

Delta aldaeraren hedapenak Estatu Batuetako panorama aldatu du, covid-19ak heriotza gehien izan dituen munduko herrialdean, hain zuzen ere. Herrialde horretako kasuen eguneko batez bestekoa aurreko astean 150.000 baino altuagoa izan zen, lehen aldiz urtarriletik, eta mila heriotza baino gehiago zenbatzen dira egunero.