Covidaren aurkako beste lau txerto posible eta zortzi tratamendu aztertzen ari da Sendagaien Europako Agentzia (EMA). Hilabete gehien aztertzen daraman txertoa Novavax estatubatuarra da. Otsailaren 3an hasi ziren eta datozen asteetan segituko dute, urte amaieran ondorio batera iristeko esperantzarekin.

Europako Batzordeak Novavaxen 100 milioi dosi lortzeko akordio bat onartu zuen abuztuan, EMAk segurua eta eragingarria dela baieztatzen badu beste 100 milioi erosteko aukerarekin.

Bestalde, Sputnik V txerto errusiarra 70 herrialdetan baimendu dute. Martxoaren 4an hasi zen EMA ebaluatzen eta prozesuan ez da polemikarik falta izan. Nazioarteko estandarrak betetzen ez zituztela susmatuta, adituek Errusiara egin zuten bidaia «kliniken praktika onak» ikuskatzeko.

Irailaren hasieran, fabrikatzaile errusiarrekin zituzten elkarrizketak «eraikitzaileak» zirela ziurtatu zuen EMAk, baina oraindik datuak behar ditu eta «zaila» da analisia noiz bukatzen ahalko duen jakitea.

Errusiako Inbertsio Zuzenaren Funtsak (FIDR), kanpoan txertoa merkaturatzen duenak, duela bi aste erran zuenez dosiaren kalitate kontrolen metodoak modernizatuko dituzte Europar Batasuneko arauetara egokitzeko eta bere onarpena lortzeko.

Sinovac txinatarra

Maiatzaren 4an, Sinovac txerto txinatarra ikertzen hasi zen Sendagaien Europako Agentzia. Desaktibatutako birus batekin egina dago eta bi dositan eman behar da, bi eta lau aste arteko tartea utzita.

Azterketek diotenez, Sinovac-ek soilik %51ko eraginkortasuna du sintomak dituzten kasuetan, baina kasu larrietan %100era igotzen da. Alabaina, oraindik ez dute behar adina datu 60 urtetik gorako pertsonengan zein eraginkortasun duen jakiteko.

Aipatutako lau txertoetako batek ere ez du Europar Batasunean onarpen datarik. Lizentzia eskatzeko gutxienekoak ere ez dituzte betetzen.

EMAk covid-19aren aurkako txerto bat baimendu zuen azken aldia martxoan izan zen, Janssen-ekin, Johnson & Johnson estatubatuarrarena. Agentziaren babesa jaso zuen laugarrena izan zen, Pfizer/BioNtech (2020ko abenduan) eta Moderna eta AstraZenecaren ondotik (2021eko urtarrilean).

Pfizer eta Moderna ARNm teknikan oinarrituak daude eta 12 urtetik gorako herritarrei jartzeko baimena jasoa dute. Pfizerrek aukera hori 5 eta 11 urte bitarteko haurrengana zabaltzeko eskatu dio EMAri astelehen honetan. Agentziak eskaera onartuko balu, 12 urtetik beherako lehen europarrak txertatuko lituzkete.

Tratamenduak

Bestalde, covid-19aren tratamenduak aztertzeko hiru prozesu ditu irekita EMAk: Eli Lilly estatubatuarrak garatutako antigorputzen botika, AstraZeneca ABren vusheld medikamentua, eta Sotrovimab, GlaxoSmithKline britainiarrarena eta Vir Biotechnology estatubatuarrarena.

Badira beste bost tratamendu aurreratuago daudenak. Dagoeneko merkaturatzeko baimena eskatu diote EMAri. Kineret (anakinra), Olumiant (baricitinib), Regkirona (regdanvimab) eta tocilizumab (RoActemra) dira.

Joan den astean, Regeneron eta Roche etxeen Ronapreve-ri lizentzia emateko aukera aztertzen hasi zen EMA.