Milotxuri bizirik plataformak eta Imanol Etxeberriak, Arizkungo alkateak, jakinarazi dutenez, «prentsaren bidez» jakin zuten Arizkungo Aintzialde eta Bergarako auzoetan zundaketak egin nahi dituela Canteras Acha S.A enpresak, gero burdin-harria atera eta harrobia egin ahal izateko.

«Herria mindua dago egitasmoaren berri izan duen moduarengatik. Lur komunaletarako Batzar Nagusian ez da notifikazio edo baimen eskaerarik sartu, jabego pribatuen kasuan bezalaxe», adierazi dute.

Igandean herri batzarra egin zuten eta bertan izan ziren 155 lagunek bozkatu zuten proiektuaren kontra. «Jakina da zundaketa egitea harrobi bat egiteko lehendabiziko pausua dela eta horregatik, Arizkungo herriak lehen momentutik hartu du proiektu honen kontrako jarrera», gaineratu dute.

«Herrian kezkatuak gaude gure lurretan harrobi baten agerpenak ekarriko lituzkeen ondorioekin». Zentzu horretan, azpimarratu dute zundaketak egiteko eskatu duten meatze-koadrikularen barnean 12 etxebizitza daudela, «gehienak XV eta XVIII. mende bitarteko baserriak direnak». Era berean, hainbat abeltzaintza ustiategi hartzen ditu, «familia hauen sustengua bermatzen dituztenak», bordak, iturriak zein auzoa hornitzen duten ur biltegiak eta basoak.

Proiektua, gainera, legez babestua dagoen Bergarako jauregiaren babes eremuaren barnean dago eta Bergara auzoa hornitzen duen ur biltegia, hoditeria eta iturburua zundaketa batetik 200 metro baino gutxiagora dago, «ura kutsatzeko dakarren arriskuarekin».

«Zenbat eta gehiago pentsatu, kezkak handitzen dira: zundaketa eremua bi auzoetako herrigunea ukitzen ari da, Arizkungo kaskotik 400 metro eskasera. Harrobiak etxebizitzetatik 40 metrotara egin daitezke, eta honek leherketak, nekazalgo lur galerak, kamioi gainkarga, eta abar luze bat ekarriko ditu berarekin», nabarmendu dute. Honen aurrean, helegiteak abiarazi dituzte «lurrak defendatzeko».