Bilboko itsasadarrean joan den ekainean itotzen ari zen gizonezko bat erreskatatu zuen Mouhammad Fadal gazte senegaldarraren «ausardia» aitortzeko ekitaldia egingo du Surne Bilbao Basketek asteazkenean, abenduaren 29an, Bilbao Arenan, Malagako Unicajaren aurkako partida hasi aurretik.
Hilabete lehenago, Mouhammad Fadalek "Bihotz kantxa" proiektuan parte hartu zuen, saskibaloia auzoetako kantxetara hurbiltzeko eta inklusioa sustatzeko talde bilbotarrak antolaturiko ekimenean, hain zuzen ere.
🙌 Reconocimiento a Mouhammad Fadal 🙌
— Surne Bilbao Basket 😎 (@bilbaobasket) December 27, 2021
Bilbao Basket reconocerá antes del partido ante Unicaja a Mouhammad Fadal, el joven senegalés que rescató a una persona en la Ría. Uno de los protagonistas de este 2021 en Bilbao 👏👏👏👏
Noticia: https://t.co/HlDxOGpQqK pic.twitter.com/3qQD1CVpGC
«Nahi gabe, saskibaloia integrazio ibilgailua dela erakusteko adibide ezin hobe bihurtu zen Mouhammad. Are gehiago, bere balentriak eta mugarik gabeko elkartasunak markatzen dute jarraitu nahi dugun bidea. Horregatik sartu genuen Mouhammad 'Izan nahi dugu' gure abonatu kanpainan», adierazi dute Bilboko taldetik.
Bada, urtea bukatzeko, Surne Bilbao Basketek aitorpena egin nahi izan dio kantxan gazte senegaldarrari, «erakutsi digun guztiagatik», eta asteazkenean Unicajaren aurkako partida hasi aurretik egingo du, Bilbao Arenan.
Bost covid-19 kasu
Bilbao Basketek adierazi du lehen taldean bost kasu positibo antzeman dituztela. Horietatik bi jokalariak dira eta beste hiruak, pasa den astean antzemandakoak, talde teknikokoak dira.
Guztiak «ondo» eta bakoitza bere etxean bakartuta daudela azaldu du klubak eta datozen orduetan, PCR proba egingo zaie gainontzeko jokalari eta teknikariei asteazkenean Unicajaren aurka jokatu behar duten partidara begira.