NBEren Errefuxiatuentzako Nazio Batuen Goi Mandataritzak (ACNUR) jakinarazi duenez, gutxienez milioi bat errefuxiatuk ihes egin dute Ukrainatik, duela aste bat Errusiaren operazio militarra hasi zenetik. «Zazpi egunetan Ukrainatik milioi bat errefuxiaturen exodoaren lekuko izan gara», ziurtatu du Filippo Grandi ACNUR-reko buruak Twitterren duen kontuan.

Ildo horretan, gerraren amaiera eskatu du, «bizitzak salbatuko dituen laguntza humanitarioa eman ahal izateko».

Bestalde, Nazio Batuen Haurren Laguntzarako Funtsak (Unicefek) ohartarazi duenez, Ukrainako gerraren ondorioz mugiarazitakoen erdiak haurrak dira.

«Ukrainako gatazkaren gorakadan harrapatutako haur eta familien egoerak okerrera egiten du minuturo. Borrokak biztanleria zibilera, haurren etxeetara eta eskoletara, ospitaleetara eta umezurztegietara hurbiltzen dira», adierazi du Catherine Russell Unicefeko zuzendari exekutiboak.

Erakundeak adierazi duenez, errefuxiatuen krisia «esponentzialki» hazten ari da, «behar humanitarioak areagotuz», eta beren herrietatik alde egin beharrean diren pertsonen erdiak haurrak direla ohartarazi du.

Gainera, adierazi du gutxienez 13 haur hil direla gerraren eraginez, Giza Eskubideen aldeko Nazio Batuen Goi Komisarioaren Bulegoak egiaztatutako datuen arabera. Aurreikusi duenez, kopuru hori handitu egingo da liskarrek jarraitzen duten bitartean.

Horren aurrean, Unicefek 140 langile ditu Ukrainan, eta gehiago bidaltzen ari dira herrialdearen beharrei erantzuteko.

«Baina Ukrainako ingurune operatiboa oso konplexua da. Sartzeko mugak eta fronteko lerroak azkar aldatzen direnez, askoz zailagoa da hornidurak eta bizi-zerbitzuak entregatzea», adierazi du erakundeak.

Horregatik, Unicefek 247,69 milioi euro eskatu ditu Ukraina barruko haurrentzat, Gai Humanitarioak Koordinatzeko Nazio Batuen Bulegoaren (OCHA) premiazko deiaren zati gisa, eta 65,51 milioi euro inguruko herrialdeetako Errefuxiatuei Erantzuteko Eskualde Planerako.

«Akordio historikoa»

Europar Batasuneko Barne ministroek akordio politiko bat lortu dute ostegun honetan, Ukrainako nazionalitatea duten desplazatuei aldi baterako babesa automatikoki emateko, Europar Batasunean askatasunez bidaiatzeko, Estatu kideetako edozeinetan kokatzeko, lana bilatzeko eta laguntza medikoa izateko.

«Akordio historikoa Barne ministroen bileran: Europar Batasunak aldi baterako babesa emanen die Ukrainako gerratik ihes egiten dutenei. EB elkartuta dago eta solidarioa da», iragarri du Gerald Darmanin Barne ministro frantsesak.