ELA, LAB, ESK, Steilas, Etxalde eta Hiru sindikatuek manifestazioa egin dute Bilbon eta Iruñean patronalak lanean segurtasuna berma dezan aldarrikatzeko. Laneko Segurtasun eta Osasunaren Nazioarteko Egunean, iaz eta aurten hildako 88 langileak omendu dituzte eta prebentzio neurriak betetzerako orduan mutualitateen «jardunbide txarra» salatu dute.

Lourdes Eraso LAB sindikatuko Laneko Osasun Arduradunak azpimarratu duenez, «lantokietan ez dugu osasun eskubidea bermatuta, ezta lanetik etxera bizirik bueltatuko garen ere». Horren adierazgarri gisa, iaz hildako 68 langileak eta aurtengo 20ak gogorarazi ditu, laneko gaixotasun erregistro «eskandalgarriaz» gain. Gaineratu duenez, Hego Euskal Herrian 17 pertsona hil dira amiantoarekin lotutako gaixotasunak direla eta.

Lanak gaixotzen eta hiltzen jarraitzen duela salatu dugu Lan Segurtasun eta Osasunaren Egunean #PrekaritateaHiltzailea

Iruñean, Bilbon eta Donibane Lohizunen mobilizatu gara
👇👇👇https://t.co/wp1Zdvwnwp pic.twitter.com/F4Wxaj4m9d

— LAB SINDIKATUA (@LABsindikatua) April 28, 2022

Gaixotasunen inguruan, Leire Heredia ELAko Laneko Segurtasun eta Osasun saileko kideak datuak ez direla ondo erregistratzen salatu du eta, bestalde, hildakoen zenbateko horrekin segurtasun neurriak ez bermatzea «aberraziotzat» jo du.

Sindikatuen arabera, lan istripuak «arazo estrukturalak dira eta ez dira berez gertatzen». Gainera, 2021ean lan ezbeharren kopurua EAEn %10,2an eta Nafarroan %16,7an igo zela gogoratu dute. Erasoren hitzetan, «prebentzio neurriak ez dira kontrolatzen eta horren erruduna patronala da, instituzioek beste alde batera begiratzen duten bitartean».

Egoera horren aurrean, sindikatuetako bi ordezkariek nabarmendu dutenez, «inork ez duenez istripuen eta osasun arazoen ardura bere gain hartzen, mobilizatzen jarraituko dugu langile klasearen osasun hobearen alde».