Tolosako epaitegiak Ernairen «ordezkari legala» deklaratzera deitu du, Andoaingo Buruntza mendiko gurutzea eraisteagatik irekitako auzian. Ezker abertzaleko gazte antolakundeak urte amaieran aldarrikatu zuen eraistea eta Abokatu Kristauen Espainiako Fundazioak auzitegietan salatu zuen.

Tolosako Lehen Auzialdiko eta Instrukzioko 3 zenbakiko epaitegiak probidentzia bat kaleratu du eta bertan Ernairen «ordezkari legala» deklaratzera deitu du uztailaren 18an, 10.00etan. Eginbide hori bideokonferentzia bidez egingo da, idazkiaren kopian agertzen denez. Ernaik oraindik ez du zitazioa jaso, erakundetik NAIZi adierazi diotenez.

Buruntza mendiko gurutzea suntsituta agertu zen abenduaren 18an, eta Ernaik horren irudiak zabaldu zituen sare sozialetan, «gurutze frankista eraitsi dugu» mezuarekin. Bideoan, zulagailu batez eta erradial batez hornitutako pertsona batzuk ageri ziren, gurutzeari eusten zion oinarria zulatzen eta haren egituraren burdinak mozten, baita gurutzea lurrera erortzen ere, hamar metro inguruko altuerakoa. 1939ko irailaren 3an altxa zuten, gerran frankisten bandoan eroritakoen omenez.

«Gaur, 1939an Buruntzan eraikitako gurutze frankista eraitsi dugu. Herri honen askatasunerako bidean, gazteok ez dugu onartuko faxismoari egindako omenaldirik», zioen bideoak.

Valladoliden egoitza duen Abokatu Kristauen Espainiako Fundazioak kereila bat jarri zuen eraispenaren egileen aurka. «Erlijio sentimenduen aurkako delituak, gorrotoa bultzatzea, legez kanpoko elkartzea eta ondarearen aurkako kalteak» leporatzen dizkie, «diskriminazioaren» gehigarriarekin, astelehen honetan ohar baten bidez jakinarazi duenez.