Gasteiz eta Burgos artean merkantzien garraioa kanpoan uzten duen eta AHTrentzat bakarrik izango den trenbide- korridore berri bat eraikitzeko obren hasieraren aurrean, Araba Bizirik-ek  Lakuako Gobernuari egungo bideak egokitzeko eta hobetzeko azterlana egin dezala eskatu dio asteazken honetan. Bizi martxa eta elkarretaratzea antolatu du plataformak tren soziala exijitzeko.

Plataformak gogoratu duenez, Gobernu espainolak, Lakua eta Arabako Foru Aldundiaren laguntzarekin, «autobide bat eraiki nahi du autobia baten ondoan». «Egungo trenbide-autobia hobetu beharrean, kostu ekonomikoa eta lurraldearen gaineko inpaktua askoz ere txikiagoak izanik, guztionak diren milaka milioi euro xahutu nahi dituzte, Arabako lurraldea txikituz, gutxi batzuek erabiliko duten trena eraikitzeko», salatu du.

Obra hau, gaineratu du, trenbide-korridore berri bat eraikitzeko da, egungoaren paraleloan, pertsonek bakarrik erabiltzeko, eta salatu ez duela balio salgaiak garraiatzeko, Lakuak onartu zuen bezala. «Azkenik, obraren sustatzaile guztiek aitortu dute gezurra esan digutela eta trenbide- azpiegitura berri honek ez duela balioko salgaiak garraiatzeko», gehitu du Araba Bizirik plataformak.

Horren aurrean, gogora ekarri du iazko maiatzean, Araba, Nafarroa eta Burgosko trenaren aldeko plataformek, Adifen eta Renferen ordezkaritza duten sindikatu gehienekin batera, akordio bat aurkeztu zutela egungo trenbide-azpiegiturak hobetu eta egokitzearen alde eta abiadura handiko trenbide berri bat es eraikitzearen alde.

Aurtengo ekainean, plataforma horiek, Burgos-Gasteiz-Iruñea-Castejon tarteak hobetzeko eta egokitzeko hiru ingeniarik diseinatutako alternatiba- azterlanaren zirriborroa aurkeztu zuten. «Aurkeztutako alternatibak Ministerioak proposatutakoak baino 1.500 milioi euro gutxiago balioko luke, eta bidaia-denboren aldea 10 minutukoa litzateke Burgos-Gasteiz tarterako eta 8 minutukoa Gasteiz-Iruñea tarterako», nabarmendu du plataformak.

Azterketa honen emaitza ikusita, egiten ari diren obrak «berehala gelditzeko» eskatu du Araba Bizirik plataformak, eta tarte berririk ez lizitatzeko exijitu. «Gobernuari eskatzen diogu egungo bideak egokitzeko eta hobetzeko azterlana egin dezala, aurtengo aurrekontuetarako onartutako aurrekontu-partida abian jarriz, eta kontuan har dezala plataformek Burgos, Araba eta Nafarroako herri eta udalekin batera, aurtengo ekainean, Madrilen aurkeztutako azterlana», azpimarratu du.