Ingalaterrako Bankuak joan den astean ohartarazi zuen Erresuma Batua atzeraldi luze batean sartuko dela, erregistroak daudenetik bizi izan duen luzeena: ekoizpena uzkurtzen hasia da jadanik, eta bi urteko atzeraldi ekonomikoa espero da herrialdean.

Erakundeak %0,75etik %3ra igo zituen interes tasak ostegunean, salbuespen puntualak salbu, 1989tik izan den igoerarik handiena. Erresuma Batuko diruaren prezioaren mailarik altuena da 2008ko azarotik, Lehman Brothersen porrotaren osteko finantza krisiaren testuinguruan.

Bankuak ohartarazi zuen, zentzu honetan, Erresuma Batua egoera «oso desafiatzaile» baten atarian dagoela. 2025erako langabezia ia bikoiztu egingo dela adierazi zuen, %3,5etik %6,5era.

Bankuko gobernadore Andrew Baileyk iragarri zuen herrialdeko biztanleek «egoera zail» bati aurre egin beharko diotela, baina bankuak irmoki jokatu behar zuela esan zuen, bestela «aurrerago egoera okerragoa» izango dela ziurtatuz. «Uste dugu inflazioa datorren urtearen erdialdetik aurrera seguruenik jaisten hasiko dela, nabarmen» argitu zuen Baileyk. Hala ere, inflazioa jaisten hasi aurretik, %11 ingurura igoko dela espero da.

Aurrez, Ingalaterrako Bankuak esana zuen Erresuma Batua atzeraldian sartzea espero zuela urte honen amaieran, eta fase ekonomiko horrek hurrengo urte osoa iraungo zuela. Baina orain uste du «ekonomia atzeraldi desafiatzaile batean» sartu zela iragan uda aldean. Aurreikuspenen arabera, 2024ko lehen erdira arte jarraituko du, eta herrialdearen historiako atzeraldirik sakonena izango ez bada ere, 1920ko hamarkadan erregistroak hasi zirenetik pairatuko duen luzeena izango da, esan zuen banku zentralak.

Tasak handitzean, bankuak inflazio handia –zeina urteko %10,1ean baitago– murriztu nahi du %2ra, eta azken 40 urteetan ikusi ez den kontsumitzailearentzako prezioen igoera erritmoa jaitsi.

Erabaki gatazkatsua

Ingalaterrako Bankuaren erabakia ezagutu ondoren, Jeremy Hunt finantza ministroak esan zuen «Gobernu britainiarrak orain egin dezakeen gauzarik garrantzitsuena egonkortasuna berrezartzea» dela eta, horrekin batera, Erresuma Batuko «finantza publikoak antolatzea eta zorra murriztea, interes tasak ahalik eta txikienak izan daitezen».

Aldiz, oposizioak gobernua kontrolatzeko izendatutako ministroak, Rachel Reevesek, esan zuen familiek ezingo dituztela jasan tasa hain altuak. «Elikagaien prezioak igotzen ari dira, energiaren fakturak handitzen ari dira eta, orain, hipoteka tasa altuagoak ditugu», adierazi zuen.

Interes tasak igotzerako orduan, Ingalaterrako Bankuak ez zuen itxaron Rishi Sunaken Gobernuak bere bere zerga eta gastu plangintzak ezagutzera eman arte. Sunaken Exekutiboak datorren azaroaren 17an emango du honen guztiaren berri.

Diru politikako batzordearen lehenbiziko bilera izango da, Liz Truss lehen ministro ohiak eta Kwasi Kwarteng Finantza ministro ohiak irailean izan zutenaren ostean. Herrialdean aplikatuko zituzten murrizketak aditzera eman zituzten orduan.

Zergatan 45.000 milioi libera jaistea aurreikusten zuen Trussen plan finantzarioak, baina liberaren balioa jaistea eragin zuen horrek. Ondorioz, Ingalaterrako Bankuak esku hartu zuen, haren esanetan, merkatuan lasaitasuna berrezartzeko.

Sunaken Gobernu berriak Trussek abian jarritako neurri finantzarioetako batzuk deuseztatu ditu jadanik.