ELA sindikatuak salatu duenez, «espainiar Gobernuak lan nekezetan dituzten langileak diskriminatzen jarraituko du, bereziki emakumeak». Ohar batean, ELAk adierazi du abenduaren 28ko Aldizkari Ofizialean Gobernuak urtebetez luzatu duela langile industrialen salbuespen egoera txanda-kontratua hartzeko orduan. Manufakturetan edo industria muntaietan lan egiten duten langileek 2011 baino lehenagoko baldintzetan hartu ahal izango dute txanda-kontratua beste urtebetez.

Horrela, enpresa berean sei urteko antzinatasuna eta 33 urte kotizatuta dituzten industriako langileek lanaldia % 75era murriztu ahal izango dute 61 urtetik aurrera (60 urte mutualisten kasuan). «Pozgarria da lan gogorra egiten duten langileen kolektibo horrentzat aukera hori izatea, baina ELArentzat tamalgarria da beste sektore pnekez batzuetako langileek aukera hori ez izatea», aztertu du sindikatuak.

Erabaki horrek «bereziki emakumeak diskriminatuko ditu, industria sektorea oso maskulinizatuta baitago», eta, hala ere, ez du aukerarik ematen zaintza eta osasun zereginen beste sektore batzuetan, non emakumeak baldintza «oso gogorretan» lan egiten duten.

ELAren ustez, horrela, «espainiar Gobernuak beste behin ere erantzuten die automobilgintzako enpresa handien beharrei, langileen osasuna zaindu beharrean, eta emakumeak lan gogorretan inolako laguntzarik gabe lan egitera kondenatuko ditu, nahiz eta urte askoan lan egin eta 60 urte baino gehiago izan».