![Nico Williams bere gola ospatzen.](/media/asset_publics/resources/000/993/278/article_main_landscape/NicoWilliams.jpg)
Athleticek erritmo bikaina hartu du. Kopan kanporatuta geratu zen Osasunaren aurka galdu ostean, baina egoera honek moralki kaltetu beharrean, kontrakoa ekarri du. Zuri-gorriak Ligan bakarrik zentratu daitezke eta Europa hartu dute helburu. Larunbat honetan oso argi utzi dute hori, Almeriaren futbol zelaian hirugarren garaipena lortu baitute segidan (1-2). Partida oso kontrolatuta izan dute, gehienbat 9. minutuan gola sartu ondoren, nahiz eta lehenengo zatiaren azken ordu laurdenean etxekoek pixka bat gehiago presionatu duten. Bigarren zatian, 0-2koarekin, erabakita utzi dute, eta 92an Almeriak 1-2koa egin duenean, zertxobait sufritu dute garaipen garrantzitsua eskuratzeko.
Gertu, oso gertu dituzte Europako postuak zuri-gorriek. Osasunaren aurka porrota jaso ostean, Betis bi puntura besterik ez dago. Bien artean Vila-real dago, eta hauek igandean jokatu beharko dute Jose Luis Mendilibarren Sevillaren etxean.
Ernesto Valverdek bi aldaketa egin ditu gaurkoan Almeriako Power Horse Stadium zelaian Realaren aurkako derbitik. Alde batetik, eskuin hegalean Oscar de Marcos itzuli da –kapitain bezala, gainera– eta Ander Capa aulkian geratu da; eta bestetik, zelai erdian, Ander Herrera titular gisa aritu da bi hilabete ostean zigortuta dagoen Dani Garciaren ordez. Atzekaldeko lerroko beste hiru postuek berdin jarraitu dute, erdian Vesga pieza oso garrantzitsua dela berriro baieztatu du Valverdek, eta aurrean Williams anaiak eta Oihan Sancet Gorka Guruzetaren atzetik aritu dira.
Beste aldean, Rubik aldaketa batzuk ere egin ditu. Bi entrenatzaileak aspalditik ezagutzen dira eta biek sistema bera eta jokatzeko modu antzekoa dute. Lehenengo zatian, ordea, Valverderi askoz ere hobeto atera zaio; lehenengo 25 minutuetan behintzat. Izan ere, bizkaitarrek oso ondo hasi dute neurketa. Normala denez talde honetan, ondo presionatu dute baloia goikaldean eta andaluziarrek arazoak izan dituzte baloia jokatuta ateratzeko.
Hori bai, Almeriak lehenengo aukera garbia izan du 7. minutuan. Leo Baptistaok jokaldi ederra egin du ezkerretik, Yerayri izkin egin eta pasea eginez, baina lehenengo jaurtiketa atzelariek atera dute eta alderatzean ere baloia urrun bidaltzea lortu dute. Dena den, jokaldia bertan behera utzi du epaileak, jokoz kanpo adierazi baitu.
Almeriaren lehen gola izan zitekeen hori, baina gola beste atean iritsi da bi minutu beranduago. Oihan Sancetek pase ederra eman dio atzelarien artean Nico Williamsi, eta honek, ezkerrez, gola egin du. Fernando atezainak –bere taldeko jokalaririk garrantzitsuena izaten ari da aurten– gehiago egin zezakeen, baina baloia eskuen eta gorputzaren artean alde egin dio eta oso poliki sartu da ate barruan.
Athletic hazi egin da eta beste lau aukera gehitu behar zaizkio estatistikari hurrengo minutuetan. Iñaki Williamsek gertu izan du, baina are gertuago izan du gola Oihan Sancetek, bi alditan. Lehenengoan, Yuriren erdiraketa bikain kontrolatu du bularrarekin area barruan baina jaurtiketa gora joan zaio; eta bigarrenean jaurtiketa gehiegi gurutzatu du Ander Herrerak –gaur oso lan ona egin du– baloi bat bikain lapurtu ostean.
Zuri-gorriek ez dituzte aukerak aprobetxatu eta Almeriak pauso batzuk aurrera egin ditu ordu erdia bete baino lehen. Athleticeko jokalariek, gainera, horretan lagundu dute, baloi batzuk galtzen hasi baitira. Horrela iritsi dira Robertonek eskuin hankarekin egin duen jaurtiketa arriskutsua Ander Herrerak gaizki alderatu ostean; Suarezen burukada kanpora; edota atsedenaldira iritsi aurretik eta epaileak Iñigo Martinezi txartel horia barkatu ostean iritsi den falta bat. Sake horretan Almeriak azkar atera du, Athleticeko jokalariak motel aritu dira eta burukada kanpora joan da.
0-2koa, baina azkenean sufritzea
Valverdek aldaketa bat egin du atsedenaldian. Alex Berenguer zelairatu du Iñaki Williamsen ordez. Hala, zelairatu berria ezkerrean ipini da eta Nico Williamsek eskuinean jokatu du. Eta Fernando atezaina urduri jartzeko aukera izan du Berenguerrek bigarren zatia hasi bezain pronto.
Nafarrak kornerra behartu du eta Iñigo Martinezek zutoinera bidali du bere burukada hurrengo jokaldian. Athleticek oso argi zuen zer egin behar eta nahi zuen, eta Ander Herrera ere saiatu da, baina bere jaurtiketa kanpora joan da.
Ez du hutsik egin Oscar de Marcosek 56. minutuan. Eskuin hegalak bere garaian aurrelari bezala jokatzen zuenekoa errepikatu du eta hegaleko sake batean Oihan Sanceten pase bat aprobetxatuz, ezkerrez gola egin du Fernandoren aurrean. Berenguerrek, ondoren, eskuadratik sartu nahi izan du, baina ez du asmatu.
Zarraga ere zelairatu du ondoren Valverdek oso nekatuta zegoen Ander Herreraren ordez, eta jokalari gazteak txartel horia ikusi du 65. minutuan; beraz, ezin izango du hurrengo neurketa jokatu. Hurrengo jokaldian, gainera, 0-3koa sartzeko aukera garbia izan du, baina Nico Williamsek eman dion pasea ez du aprobetxatu eta Fernandoren eskuetara bidali du baloia.
Rubik aldaketa guztiak egin ditu, baina partida asko ireki da eta Athleticek gol gehiago sartzeko aukerak izan ditu. Hori bai, azken minutuetan saltsa eman dio neurketari Almeriak, Centellesek 92an 1-2koa egin baitu. Garaipena eskuetan zuen Athleticek eta azkenean, zertxobait sufrituta, hirugarren jarraipen segida lortu du Ligan; hori bai, Vesgak txartel horia ikusi du ere 93an eta ezingo du hurrengo partida jokatu.
Europa gertuago dute bilbotarrek; Almeriak asko konplikatu du bere sailkapena. Eskerrak eman beharko dizkio Espanyoli, ostiral gauean Cadizen aurka berdindu baitzuen eta oraindik beste hiru talde ditu bere atzetik, Bigarren mailara jaisteko postuetan.
![Acdc](/media/asset_publics/resources/001/145/041/article_thumb_horizontal/ACDC.jpg)
AC/DC: El origen de una leyenda contada desde los márgenes
![0811_eh_pavel](/media/asset_publics/resources/001/145/092/article_thumb_horizontal/0811_eh_pavel.jpg)
Polonia mantiene abierta la investigación contra Pablo González y podría juzgarlo en rebeldía
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)