Igande honetan Gasteizen jokatuko den partida inflexio puntu moduko bat izan daiteke Binakako txapelketarentzat. Bai behintzat lehen bi postuetan sailkatuko diren bikoteen arteko lehiari dagokionean. Sukarrak jota dagoen Peio Etxeberriak eta Jose Javier Zabaletak osatzen duten bikotea Jokin Altuna eta Julen Martijari irabazteko gai badira, Aspeko nafarren bikoteak hiru puntutako aldea –laukoa elkarren arteko tanto aldea kontuan hartzen badugu– aterako lioke, oraintxe euren bigarren postua zalantzan jartzeko gai ikusten den bikote bakarrari.

Garaipena 2022ko txapeldunek eskuratuko balute, ordea, alde hori puntu bakarrekoa litzateke, baina Jokin Altunak, momentuz, izan zuten hasiera kaskarra kontuan izanda, ez du bere burua borroka horretan ikusten. «Eurek ia hiru puntu ateratzen dizkigute, lehen itzuliko partida 22-9 irabazi zigutelako. Hau irabazita puntu bakarreko desabantaila izateko bederatziz azpitik irabazi beharko genieke, eurek tanto gehiago eginda ia beste puntu bat da eurentzat. Nik uste hauek eta Jaka-Mariezkurrena bi lehenengoak izango direla ia ziur eta guk saiatu behar dugu seigarren puntua –teorian playoffean egotea bermatuko lukeena– ahalik eta azkarren lortzen, topera joango gara eta gero, hirugarren edo laugarren izateko aukerak badaude, sari handia izango litzateke guretzat», azaldu du gaurko material aukeraketan.

Lehen lau jardunaldietan jasotako lau porrotak –amezketarra baja izan zen lehen hiruretan– zama handia izan dira bikotearentzat, baina beste lau garaipen eskuratu dituzte jarraian aurkariek oso kontutan hartzen duten bikotea bihurtu dira. Jose Javier Zabaletak oso argi dauka «oso bikote arriskutsua direla eta txapela gertu izango dutela». «Jokinek jokatu zuen lehen partida baino ez dute galdu, txapeldun izan den bikote bar dira, elkar oso ondo ulertzen dutenak kantxan eta kantxatik kanpo eta horrek asko egiten du. Nik azkenaldian ikusi ditudan partidengatik bikoterik onenak dira eta nik hasieratik faborito jotzen nituen», gaineratu du.

Martija ere behera begira

Altunaren alboan asko hazi den Julen Martijak ere, nahiago du behera begiratu gora baino. «Irabazten badugu gauzak ondo jarriko zaizkigu, baina era berean, behekoak ere oso gertu daude, puntu batera edo bira eta bi partida jarraian galduta berehala harrapatzen zaituzte. Ez gara erlaxatu».

Neke-lan handikoak izan dira Gabon egun hauek pilotarientzat, atsedenerako ia tarterik gabekoak eta Jokin Altunak arazorik gabe gainditu du bolada hau. «Azkena partida oso gogorra izan zen eta momentu batean zartako txiki batek eman zidan sorbaldan. Oraindik puntutxo bat badut sorbaldan erabat sendatu gabe, baina esan zidaten errekuperazioa pixkanaka izango zela, bide onetik noa eta aitzakiarik gabe», azaldu du.

Peio Etxeberriak Gasteizen izan da gaur, baina sukarrarekin, ez du material aukeraketan parte hartu. Gaur Zabaletarekin asteko entrenamendu nagusia osatzekotan ziren, baina ostegunerako errekuperatu eta orduan egin nahiko lukete nafarrek saio on bat.

Kontratu berritzeak

Kontratuak duela aste batzuk hitzemanda zeuden arren, Aspek gaur eman du jakitera bost pilotariren lan hitzarmenak berritu dituela. Erostarbe, Zabala, Bikuña eta Tolosak bi urterako eta Egiguren V.ak urte betez.