Itsasotik erreskatatutako 80 pertsona baino gehiago eta bi gorpu daude Geo Barents ontzi humanitarioan, Mediterraneoan salbamendu-operazio konplexu bi egin ondoren. Hala jakinarazi du igande honetan ontziaren jabea den GKEak, Mugarik Gabeko Medikuak (MGM).

«Bart, gure taldea tragedia berri baten lekuko izan zen Mediterraneo itsasoan. 80 pertsona baino gehiago erreskatatu ditugu bi operazio konplexutan. Pertsona bat hilda aurkitu dugu, beste bat Geo Barents ontzian hil da. Hiru pertsona falta dira», idatzi du GKEak bere sare sozialetan.

Ontzi humanitarioko tripulazioak arriskuan zegoen txalupa batean bidaiatzen ari ziren 60 pertsona erreskatatu zituen, eta, bertan, «zoritxarrez pertsona bat hilda aurkitu zuten». Alarm Phone taldearen bidez jaso zuten abisua.

«Italiako agintariek Tunisiako agintariekin koordinatzeko emandako jarraibideei jarraituz, Geo Barents petrolio-plataforma baterantz abiatu zen, eta zailtasunak zituzten 19 pertsona erreskatatu zituzten», azaldu du GKEak. Kasu honetan, Frontexen abisua jaso zuen ontzi humanitarioko tripulazioak.

Bizirik suertatu zirenek azaldu zuten beren ontzian «ura sartzen hasi zela, eta, beraz, petrolio-plataformaraino igeri egin zutela salbatzeko». «Ontzian, noraezean», hiru pertsona geratu zirela ohartarazi du.

«Agintariek bila ditzatela eskatzen dugu», galdegin du Alarm Phonek.

MGMak azaldu duenez, «bizirik atera diren guztiak indarrak hartzen ari dira, eta Geo Barentsen arreta jasotzen ari dira esperientzia traumatiko horien ondoren».

Horietako bat helikopteroz eraman behar izan zuten Maltako ospitale batera, tratamendua behar zuelako.

«Ahalik eta leku seguruenean lehorreratzea eskatzen dugu, hildakoei hileta duina bermatzeko eta bizirik atera direnei arreta egokia eta azkarra emateko», erantsi du GKEak.