![Itsaso Erasun eta Olatz Arrizabalagaren arteko besarkada, finala irabazi berritan.](/media/asset_publics/resources/001/092/604/article_main_landscape/binakakoa.jpg)
«Bikote ona osatu dugu, ongi ulertu gara. Finalerdietan berak lagundu zidan eta gaur elkarren artean atera dugu aurrera. Mentalitate positiboa izaten saiatu gara, motibatuta egoten eta, agian, esperientzia ere lagun izan dugu. Bigarren erditik aurrera eurak baxuago aritu gara eta guk aurrera egin dugu». Kantxan ez ezik, partida osteko elkarrizketan ere ederki moldatzen da Olatz Arrizabalaga, partidaren gakoak azaldu asmoz. Gernikarrak, Binakakoan, bosgarren txapela irabazi du, gaur, Arrasateko Uarkape pilotalekuan –948 ikusleren aurrean–, Itsaso Erasun sendo batek ongi lagunduta. Zizurkilgoari kosta zaio lehendabiziko pilotakadetan, urdinek atzean kargatu dutenean baina atzetik aurrera egin du gipuzkoarrak eta eskuak fresko zituela bukatu du partida.
«Une batean pentsatzen nuen ezingo nuela eutsi baina buruari kontra egin eta lortu dugu. Olatzek uneoro esaten zidan segitzeko, bagenekigun hor zegoela partida, fisikoki ondo geunden eta eusteak merezi izan du», azaldu du atzelari zizurkildarrak. Bere lehendabiziko finala zen eta txapelketari ginga ezin hobea jarri dio. Txapelaren eskaintza ere aski polita egin du, 18-15ean egin zuen lehen tantoa bezalakoxea: «Txapel hau nire amonari eskaini nahi diot, asko maite dudalako eta erreferente handi bat delako niretzat».
Kosta zaio partida hastea, Etxegarai eta Gaminde errukirik gabe aritu baitira, pilotakada gogorrak atzeko koadroetara bidalita. Bien bitartean, Erasuni kosta egiten zitzaion Etxegarairen gainetik pilota pasatzea eta une batzuetan, zital aritu da oñatiarra, bikote gorriari sekulako buruko mina eraginez.
Gernikarraren zigilua
Oso parekatuta egon da lehia, ez batak ez besteak ez dute lortu markagailua apurtzea, alde handiak ateratzea... Akats eta distiraren artean dantzan ibili dira, pilota ezin gozatuta zeudela. Akaso, lehendabiziko zati horretan, Etxegarai izan da gehien gozatu duena, atzera sekulako txisparekin bidaltzen baitzuen pilota. Hala, Erasunek zenbait akats pilatu ditu, eta beraz, gorriak ere nahi eta ezinean aritu ziren.
Saiatu da gernikarra Erasuni airea eskaintzen, tarteka jokoan sartu eta arriskatzen baina pilota erraz batzuk ere galdu ditu. Nolanahi ere, estatistikek nahikoa esaten dute: 13 egindako pilatu zituen eta soilik 3 galdutako.
Sei tantoko berdinketa ezarri ostean –gozatu gabeko pilota txokoan jarrita–, hasi da apurka apurka Arrizabalaga bere distira azaleratzen. Sakez, pilota ederki bihurrituta, egin du 8-6koa eta urdinek, beste behin atzean egindakoarekin, aldea murriztu badute ere, Gernikako aurrelariak, dejadaz (9-7) eta aurkariak zein ikusle guztiak ezustean harrapatu zituen esku aldaketarekin (10-8), bere zigilua ezarri du.
Urdinen frustrazioa
Abagunea izan dute gorriek aldeak handitzeko baina defentsan sendo agertu dira Madalen Etxegarai zein Enara Gaminde, atzean oso erregular, agintzen une batzuetan, eta jakin izan dute gorrien ahulguneetan mina ematen. Hala berdindu dute hamarna tantora, partidan seigarren berdinketa ezarrita. Arrizabalagak, hormabiko paregabearekin, gorriak aurretik jarri ditu baina urdinek, hiru tanto jarraian eginda –11-12koan Laukizko atzelaria, hanka azkarrekin, txokoan pilota jasota–, bide onean jarri dira (11-13).
Lehen atsedenaldi luzera ere aurretik joan dira urdinak baina bazegoen zerbait guztiz gozatzea ahalbidetzen ez ziena, behintzat Laukizkoaren kasuan. Pilota erabat gozatu gabe zegoen, partidak aurrera egin ahala tantoak ere gogortzen hasi dira eta errematerako aukera gutxi izan dituzte. Izan zitekeen arrazoietako bat, eta horrek eraman die bigarren erdian urrats bat atzera egitea. Buruari ezin buelta eman eta 5-0eko partziala ezarri die gorriek, Erasunek atzean ongi eusten ziola, eskuinarekin pilota ongi sartzen, eta aurrean Arrizabalagak bere sasoi ona erakutsi zuela.
Zuzenean 22ra arte
Gorriak, 22ra bidean, zuzeneko martxa sartu eta soilik pilota bakarra galdu dute, 18-16koa. Urdinak burumakur aritu dira azken txanpan, ilusioz ekin zuten deman frustrazioa nagusituta, gaztetasunaren adierazle. Gorriak, aldiz, esperientziatik, gaizki hasi zuten partida iraultzen jakin dute.
Arrizabalagak bere bosgarren txapela jantzi du –kasu honetan morea kolorekoa, eta ireki zuen honek debaterako tartea ere–, eta pilotaren historian pasarte bat idatzi du. Maiz II.a, Retegi II.a eta Martinez de Irujo handien marka berdin du gernikarrak Binakakoan. Gainera, azken hiru txapelak jarraian irabazi ditu, eta txapelketa honek dituen bederatzi edizioetatik, zazpi aldiz iritsi da finalera. Ezbairik gabe, aro bat markatzen ari da. Eta ezin ahaztu, aro honetan, lagun eta arerio dituen gainontzeko pilotariez, gaztetasunetik sekulako urratsak ematen ari baitira. Honek ez dauka etenik; edo ez luke eduki beharko, hauen sabaia oraindik ere urrun baitago.
![Acdc](/media/asset_publics/resources/001/145/041/article_thumb_horizontal/ACDC.jpg)
AC/DC: El origen de una leyenda contada desde los márgenes
![0811_eh_pavel](/media/asset_publics/resources/001/145/092/article_thumb_horizontal/0811_eh_pavel.jpg)
Polonia mantiene abierta la investigación contra Pablo González y podría juzgarlo en rebeldía
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)