![Izaskun Arrue Kulturgunea izendatu du Udalak Gasteizeko Antzokia.](/media/asset_publics/resources/000/990/417/article_main_landscape/gastei_antzokia.jpg)
Lazarraga Kultur Elkarteak joan den ostiralean, apirilak 12, jaso zuen azkenean 2023ko dirulaguntzaren zuriketaren kontu-hartzailearen xedapenaren jakinarazpena, martxoaren 27an Tokiko Gobernu Batzarrean onartutakoa. Bertan, bi aste lehenago aurreratu zitzaion moduan, eskatutako itzulketaren kopurua 112.817,10 eurokoa izatea baieztatzen da.
«Aurkeztutako zuriketan proposatutako diru-itzulketaren (proiektua prestatzen gastatu gabeko 50.487,48 euro) bikoitza baino gehiago da Gasteizko Udalak elkarteari eskatzen diona xedapen honen arabera. Proiektuaren bideragarritasuna kolokan jartzen duen ebazpena, ezbairik gabe», salatu du ohar batean.
Dioenez, «onartutako jakinarazpen honetan, halaber, ez dira zalantzan jartzen elkarteak dirulaguntzaren zuriketan aurkeztutako fakturak eta ordainagiriak: 2023an elkarteak egindako gastuak eta diru-irteerak bere horretan onartzen dira, horrenbestez. Salbuespena soldatetan gastatuko dirulaguntzaren %5a da, izan ere, kopurua kalkulatzeko orduan Udalaren txostenean ez da hitzarmenean hitzez hitz aipatzen den ‘dirulaguntzaren zenbateko osoa’ kontuan hartzen, gastatu den diru kopurua baizik».
«Nahiz eta hitzarmen osoan ez aipatu dirulaguntza jardueraren ehuneko bati mugatu behar denik, Udalaren txostenean, ‘dirulaguntza onargarri’-aren kontzeptua bat-batean agertzen da,eta gastatutakoaren –ez, adibidez, jasotako kopuruaren– %78,70ean zenbatzen da; beste guztia itzuli beharrezkoa da. Berdin dio elkarteak jadanik gastatu duen ala ez», azaldu du.
Plan Operatiboan jasotako gastuak
Elkartearen ustetan, Udalaren xedapenean hainbat argudio ez dira kontuan hartu, eta ondorioz hartutako erabakia, «proiektuaren etorkizunerako oso arriskutsua izateaz gain», ez du bidezko ikusten. Hala, garatu beharreko proiektuaren ezaugarriak eta gastuak elkarteak egindako eta Udalak onartutako Plan Operatiboan jasota zeudela gogoratu du, «eta horrela sinatuta dago 2023ko hitzarmenaren baitan».
Halaber, nabarmendu du egindako gastu guztiak udalak ezagututa eta baimenduta egin direla beti: langileak, programazioa, kudeaketa programak, komunikazio plana… «Are gehiago, egindako gastuak hainbat partidatan aurreikusitakoak baino txikiagoak izan dira. Besteak beste, langile gastuak aurreikusi baino 23.305,51 euro txikiagoak izan dira kulturgunea irekitzeko teknikari laguntzaileak ez direlako kontratatu; inbertsioen partidan aurreikusi baino 23.331,80 euro gutxiago gastatu dira; kudeaketa gastuen partidan 21.635,01 euro gutxiago gastatu dira. Eta noski, kultura programazioaren eta produkzioaren 54.290,00 euroko gastuak ez dira egin kulturgunea irekita ez delako egon. Ondorioz, aurrekontuan jasota zeuden 372.226,00 eurotatik 242.462,52 euro baino ez dira gastatu; 129.763,48 euro gutxiago».
Bestalde, kulturgunea ez zabaltzeak, elkartearentzat ondorio larriak izan dituela nabarmendu du, ez baitu izan aurreikusitako diru-sarrerak jasotzeko aukerarik: «Sarreren salmentengatik eta izen emateengatik 31.776,00 euro; espazioen eta tabernaren lagapenengatik 6.000 euro; babesleengatik eta beste hitzarmenengatik 41.500,00 euro… guztira elkarteak 79.276,00 euri galdu ditu. Baina hau ez da aipatzen Udaletik ateratako xedapenean».
«Ez irekitzeko aitzakiak Gasteizko Udaletik etorri dira»
«Ez da ahaztu behar, Lazarraga Kultur Elkartea dela Udalak Gasteiz Antzokia-Euskararen Etxearen proiektua kudeatzeko egin zuen lehiaketa irabazi zuen elkartea, eta lau urtez luzatzeko hitzarmen-esparrua duela honetarako. Eta ia bi urte hauetan ireki ez bada, ezin zaio egotzi elkarteari errua, inondik inora. Elkarteak etengabe, publikoki zein udaleko arduradunekin izandako hainbat bileretan, kulturgunea lehenbailehen irekitzeko eskaera egin dio Gasteizko Udalari. Ez irekitzeko arrazoiak eta aitzakiak Gasteizko Udaletik etorri dira, behin eta berriz. Orain, ordea, elkartea da egoera honetan kalteak pairatzen dituena. Eta kalte bikoitza, gainera: kulturgunea kudeatzeko jaso gabeko diru-kopuruaz gain, orain itzultzeko eskatzen zaiona gehitu behar zaio. Udalaren xedapenak egoera okertu besterik ez du egin, eta etorkizuna kolokan uztera etorri da. Proiektua ez ezik, elkartea bera ere oso kaltetua dago erabaki hauen ondorioz», adierazi du.
Ohartarazi duenez, «zoritxarrez, eta puntu honetara helduta, egoera honetan proiektuak ez du aterabide handiegirik: elkarteak ezin du itzuli ez duen diru bat, proiektuan Udalaren ezagutza eta baimenarekin gastatutako dirua, alegia. Ez badu behintzat Gasteizko Udalak egitasmoarekin aurrera egiteko bideak zeintzuk diren argitzen, egon badaude».
Dioenez, Gasteizko Udalak «harago jo beharko luke, eta proiektuari argia emango dion alternatiba integralak eskaini». Halaber, Lazarraga Kultur Elkarteak Udalari eskatzen dizkio egoera hau iraultzeko irtenbideak: «proiektu honek elkartean konfiantza osoa duen Udal gobernu bat behar du, eta elkarlanean alternatibak bilatuko dituen aldebiko harremana; proiektu honek Gasteizen kulturgune euskaltzalea erreferente bihurtzeko egin behar diren pausu finkoak emateko borondatea behar du; proiektu honek egitasmoan sinesten duen Gasteizko Udal bat behar du; eta horiek gabe ezingo du elkarteak aurrera egin, ezta proiektuak ere».
«Bide honetan pausuak eman ezean, guztiok galduko dugu prozesu honetan: elkarteak amestutako proiektua; Udalak kulturgunea behingoz zabaltzeko aukera; euskarak arnasgune bat; sormenerako espazio bat; eta gasteiztarrek euskaraz bizitzeko leku bat. Udalaren borondate faltak Gasteiz Antzokiaren proiektua kolokan utzi du: Udalak sortutako arazoari Udalak aurkitu beharko dio irtenbidea», amaitu du.
![Acdc](/media/asset_publics/resources/001/145/041/article_thumb_horizontal/ACDC.jpg)
AC/DC: El origen de una leyenda contada desde los márgenes
![0811_eh_pavel](/media/asset_publics/resources/001/145/092/article_thumb_horizontal/0811_eh_pavel.jpg)
Polonia mantiene abierta la investigación contra Pablo González y podría juzgarlo en rebeldía
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)