Julen Del Rioren eskuinak min eman zezakeela itxaropena zabaldua zegoen, gasteiztarrak sekulako maila erakutsi baitu azken hilabeteetan. Erabakigarria ere izan da Bilboko Deportivo pilotalekuan jokatu diren partidetan baina Aritz Erkiagaren bertsio onenarekin topatu zen atzo (15-4 eta 15-13). Ispasterkoaren porrotik ezagutu gabeko bolada ona, hain zuzen ere, Bizkaiko hiriburuan bukatu zen, Laduche-Manciren aurka, ligaxkako partidan. Min eman zion porrotak bizkaitarrari eta mindutako pizti bat moduan berragertu da ordutik, bere erremate zitalekin.  

Bilboko finalean, ohartzerako, 8-1eko abantaila lortu zuten ‘pantera arrosek’. Kamiseta arrosarekin gailendu zen Gernikako Winter Seriesean Erkiaga-Ibarluzea, izenondo ezin aproposagoa bere eginez. Iron Cup txapelketan ere berdina egin dute, pantera arrosa legez, zarata gehiegirik atera gabe, beste txapel bat bereganatu, alegia.

Aritz Erkiagak 2024. urtean jokatu dituen final guztiak irabazi ditu, bat izan ezik –Durangoko Winter Serieseko Banakakoa, Johan Sorozabalen aurka–. Aurkari guztiek gainditu nahi duten aurkaria da, bai eta atzelari guztiek beren bikote izan nahi duten aurrelaria ere. Julen Del Riok, esaterako, berarekin irabazi zuen Gasteizko Araba Euskaraz txapelketa. Erkiagarekin jokatzeak «konfiantza asko» eman ziola onartu zuen gasteiztarrak NAIZi emandako elkarrizketan eta, oro har, pilotari guztientzat da babesleku Ispasterkoa.
Bai eta Ion Ibarluzearentzat ere. Bilboko garaipenarekin, atzelarien artean, lehendabizikoa da Jai Alai Leagueko sailkapenean –Julen Del Rioren aurretik–, soilik zirkuituko bi txapelketetan lehiatuta. Bietan Erkiagarekin eta bietan, txapela burura.

Pilota bizkortu aurretik, zirt eta zart

Arrosen ideiak argiagoak ziruditen finala hasterako. Premia bakarra zuten eta ongi bete zuten: pilota oraindik hotz zegoela baliatu aldeak irekitzeko eta Del Rioren eskuma akitzen joateko. Izan ere, pilota gastatu ahala, bizkortzen joaten da eta egoera horretan, bere zigilua ezartzen du atzelari gasteiztarrak.

Arrosek ongi neutralizatu zituzten Urrutia zein Del Rioren birtuteak. Erkiagak tanto ikusgarriak eskainiz Bilbora gerturatutako jende andanari –beste ostiral batez harmailak bete egin ziren– eta Ibarluzeak, errebesez zein eskumaz, ziurtasuna erakutsita. Seta hasi eta buka, arrosek menperatu zuten (15-4). Urrutia zein Del Riok ere nahiago izan zuten ideiak garbitu eta zerotik hasi hurrengo jokoan, atzetik aurrera egin eta egoera iraultzen saiatzeko.

0-5eko hasierarekin, oraindik kontatzeko asko zeukatela azpimarratu dute horiek. Donibane Garaziko aurrelariak erremate onak egin zituen, Erkiagari aurrez-aurre jokatuz,  eta Gasteizkoak tantu-sorta bat egin zuen eskuinarekin, goitik-behera botata. Maldan behera jarri zitzaien jokoa horiei, atsedenaldira 5-8ko abantailarekin iritsita. Jokoa gelditu eta Ispasterko piztia berriro ere esnatu zen arte. Bost tanto erreskadan eginda, arrosek aurrea hartu zuten (10-8) eta emozio handiko bukaera bizi izan zen: arrosen garaipena edo partida luzatzea baitzegoen jokoan, eta argi dago zaletu neutralak zer nahi duen...

11-10era hurbildu ziren horiak baina Ibarluzeak, txapa gaineko batera iritsi, eskuinez zaila jarri eta hurrengo pilotakadan errebesez egin tanto garrantzitsua egin zuen: 12-10. Ausart erantzun zion Urrutiak, inork uste gabe, zabalean moztuta (12-11), baina pantera arrosak, behin markagailuan aurretik jarri zirela, ondo jakin zuten dema ixten (15-13).

Elaia-Ihart, txapeldun

Emakumezkoetan, emozio handiko finala eskaini zuten lau puntistek, txapela Elaia Gogenola eta Ihart Arakistainek bereganatu zutela, estretagia arma nagusi baliatuta: Erika Mugartegi markinarra jokoan sartzea saihestea.

Frida Watkins zumaiarra asko kargatu zuten, honek pilota asko sartu zuen baina Berriatuko aurrelaria fin aritu zen errematean: sahietseko posturan barruan, eskuinez txik-txakean, txapa gainean moztuta... Tanto zinez ederrak. Partida oso serioa jokatu zuen, atzean Arakistainek sendotasuna erakutsitako. Sopelako pilotaria ongi egokitu zen atzeko kuadroetara. Lehen seta 15-12 irabazi zuten marroiek eta bigarrengoa, emaitza berdinarekin, bereganatu zuten horiek. Erika Mugartegi jokoan sartu zen. Errebotearekin jokatu zuen markinarrak eta arerioek ezin izan zuten erantzun. Durangoko finalean ere antzerako egoera eman zen, atzetik aurrera egin zuen eta desenpatera ere sasoiko iritsi zen. Atzo, baina, Gogenolak bere zigilua jarri zuen, seta 5-1 eta txapela irabazteko.