Euskal Herriko Unibertsitateko (EHU) katedradun bati bederatzi urte eta bederatzi hilabeteko kartzela zigorra ezarri dio EAEko Auzitegi Nagusiko Arlo Zibileko eta Zigor arloko Salak, ondasun publikoak bidegabe eralgitzearen, prebarikazioaren, dokumentu publikoak faltsutzearan eta Administrazioari iruzur egitearen delituengatik.

EAEko Auzitegi Nagusiak ere bi urte eta hiru hilabeteko kartzela zigorra ezarri dio haren emazteari, Administrazioari iruzur egitearen, ondasun publikoak bidegabe eralgitzearen eta prebarikazioaren delituengatik, Bizkaiko Auzitegiak aurretiaz ezarritako zigorraren zati bat atzera bota duen ebazpenean.

EAEko Auzitegi Nagusiak berretsi egin ditu Bizkaiko Auzitegiak frogatutzat jotako delituak. Haren arabera, katedradunak EHUko sail bateko zuzendari postua baliatu zuen, bai eta master bat ere, behar ez ziren edo masterraren zuzendaritzak eman ez zituen kontzeptuengatik fakturak egiteko, zeinak unibertsitateko kontabilitate zerbitzuak masterreko ikasle ohien elkarte baten titulartasuneko kontu batean ordaindu baitzituen. Elkarte hori, ordea, berak eta haren emazteak kudeatzen zuten.

Gainera, auzipetuak bere emaztearekin hitzartuta eta adostuta jardun zuen, hura kontratatzeko, masterrerako zerbitzuak eman zitzan, normalean ezarritako kontratazio prozedura saihesten ari zirela «jakinaren gainean» baziren ere.

Aurreko epaia

Lehen Auzialdiko auzitegiak zortzi urte, sei hilabete eta lau eguneko kartzela zigorra ezarri zion guztira katedradunari, eta bi urte eta bi egunekoa emazteari, eta bidegabeko atzerapenen aringarria hartu zuen kontuan.

Orain, Auzitegi Nagusiak partzialki atzera bota du Bizkaiko Auzitegiaren epaia, Fiskaltzak eta EHUk jarritako errekurtsoaren zati bat baietsi ondoren; izan ere, besteak beste, ondasun publikoak bidegabe eralgitzearen delituaren azpimota astundua aplikatzea eskatzen zuten, ostutako funtsen zenbatekoagatik, ostearen izaera sistematikoagatik eta denboran luzatzeagatik (gutxienez 2010etik 2015era).

Ebazpenean jasotzen denez, lapurtutako zenbatekoa 213.115 eurokoa izan zen. Auzipetuen defentsak planteatutako alegazioak baietsi ditu halaber Auzitegi Nagusiak, desgaikuntza bereziko zigorraren zehaztugabetasunarekin lotuta daudenak, bai eta EAEko Auzitegi Nagusiak auzipetutako biek EHUri ordaindu behar diotela adierazi duen kalte-ordainari eragiten dion diru kopuru egokietako bat ezartzean egindako akats batekin ere.

Horrela, Auzitegi Nagusiak katedradunari bost urte eta hiru hilabeteko espetxe zigorra eta 15 hilabeteko isun zigorra –eguneko hamar euro ordainduta– ezarri dio, funtzionario publiko batek dokumentu publikoak faltsutzearen delitu jarraitu baten egilea den aldetik. Bidegabeko atzerapenen aringarria aplikatu diote.

Halaber, lau urte eta sei hilabeteko espetxe zigorra eta enplegu edo kargu publikorako desgaikuntza berezia ezartzen dizkio, zortzi urte eta sei hilabetez, Administrazioari iruzur egitearen delitu bat, prebarikazioaren delitu bat eta ondasun publikoak bidegabe eralgitzearen delitu baten egilea den aldetik. Hemen ere bidegabeko atzerapenen aringarria aplikatu diote.

Emakumeari zigorra

Auzitegi Nagusiak bi urte eta hiru hilabeteko kartzela zigorra ezarri dio emakumeari, eta enplegu edo kargu publikorako lau urte eta hiru hilabeteko desgaikuntza ezarri dio, Administrazioari iruzur egitearen delitu bat, prebarikazio delitu bat eta ondasun publikoak bidegabe eralgitzearen delitu jarraitu baten egilea den aldetik. Kasu honetan ere atzerapenaren aringarria dago.

Gainera, biek EHUri 39.960 euroko kalte-ordaina eman beharko diote erantzukizun zibilagatik, eta katedradunak, gainera, epaia betearaztean zehaztuko den zenbateko bat ordaindu beharko dio euskal unibertsitate publikoari, oinarri honen arabera: 173.155 eurori 2010eko otsailetik 2015eko maiatzera arte administrari laguntzaile bati ordaindutako kopuruak kenduko zaizkio.

Epai hau ez da irmoa, eta errekurtsoa jar daiteke Auzitegi Gorene espainiarrean.