Euskara eskakizuna argudiotzat hartuz, epai berri bat argitaratu du Donostiako Administrazioarekiko Auzietako 1 zenbakiko Epaitegiak. Bertan behera utzi du Kabiak, Gipuzkoako Foru Aldundiko erakunde autonomoak, egoitzetako langileentzako 34 plaza betetzeko egindako deialdia, uste baitu «euskara jakiteko baldintzek enplegu publikoa lortzeko oinarrizko eskubidea urratzen dutela».

Erabaki berri hau euskararen aurkako oldarraldi judizilaren baitan kokatzen da. Urrutira joan gabe, duela bi aste Diputazioaren ostatuetako garbitzaileentzako deialdi baten aurka ere egin zuen Donostiako epaitegiak.

Hau salatzeko mobilizazio ugari izan dira azken hilabteetan. Orain dela urtebete, manifestazio jendetsua izan zen Bilbon, euskararen normalizazioaren aurkako sententziak salatzeko milaka lagun bilduz.

Efe agentziak ezagutzera eman duen epai batean, epaitegiak partzialki onartu du Francisco Ignacio Lopez Lera abokatuak jarritako errekurtsoa, bi langileren ordezkari gisa.

Ebazpenak argudiatzen duenez, errekurritutako deialdiaren oinarriek «inposatu» egiten dituzte Kabian euskara normalizatzeko helburuak maximizatu nahi dituzten hizkuntza-baldintza batzuk, eta, beraz, «gutxitu egiten dituzte enplegu publikora sartzeko aukerak».

Testu judizialak adierazten du, halaber, Aldundiaren 2018-22 aldirako Normalizazio Planak ezarritako «nahitaez bete beharreko» euskararen «aurkibidea» ezin dela Kabiak 2020an egindako deialdiaren «oinarrietara eraman», kaltetuen eskubidea «sakrifikatzeraino».

Ildo horretan, indize hori «gradualki» aplikatu behar dela defendatzen du, eta «hutsik dauden plazak eskuratzeko deialdia ez dela proposatutako normalizazio-helburua lortzeko bitarteko egoki bakarra» plan horretan, beste batzuk ere badaudelako, hala nola «mugikortasuna, lekualdatzeak edo prestakuntza-planak».

Epaiak «desproportzionaltasuna» antzematen du eskainitako 34 plazetatik 32ri bigarren hizkuntza-eskakizuna (2. HE) eskatzean.

Hori dela eta, ebazpenak dio «ezinezkoa» dela «enplegu publikorako hautagai guztiei» eremu berean «hizkuntza-eskakizuna duten dotazioen eta foru-lurraldean euskalduntzearen indize esponentzialaren arteko aldea adierazten duen defizita helaraztea», eta horren ondorioz, hautagaiek «deitutako plazetara berdintasun-baldintzetan sartzeko duten eskubidea mugatzea».

Epai hau ez da irmoa, bere aurka apelazio-errekurtsoa aurkez baitaiteke.