Hamabost urteren ondoren, Aralarrek badu berriro Guardetxea. 1910ean inauguratu zen eraikina 2009an eraitsi zuten, egituran gabeziak zituelako eta zaharkitua zegoelako. Nafarroako Gobernuak zona horretarako «erreferentziazko balio handiko azpiegitura berri bat eraikitzea» erabaki zuen eta asteazken honetan aurkeztu du Landa Garapeneko eta Ingurumeneko Departamentuak Aralarko Ingurumen Zaintzako Guardetxe berria. Azpiegitura horrek mendilerro enblematikoan basoak kudeatzeko eta lantzeko ekipamenduak eskainiko ditu, baita abeltzaintzari laguntzeko ere.

Jose Mari Aierdi kontseilariak Nafarroako Baso Agendaren helburuetan kokatu du jarduera hau, eta azpimarratu du, ildo horretan, instalazio honek «erraztu egingo duela Aralar mendiko baso aprobetxamenduen eguneroko kudeaketa, bai zurezko baliabideena, bai abeltzaintzakoak edo erabilera turistikokoak».

Guardetxe berriak 465.000 euroko inbertsioa du guztira, zurezko egitura eta zink inguratzailea ditu, eta 156 metro koadroko azalera eraikia du, horietatik 113 erabilgarriak. Eraikuntza jasangarriaren irizpideen arabera eta hurbileko materialekin eraiki da. Izan ere, erabilitako egurraren %80 ziurtatua da eta, neurri handi batean, Aralarko mendilerrotik bertatik dator, batez ere, basoko alertze eta pinu egurra, birpopulaketetatik datorrena. Era berean, harriak eta hurbileko materialak erabili dira horma eta hesietarako.

Eraikina erabat autonomoa da, A maila kalifikazio energetikoa du, lehen mailako energia ez-berriztagarriaren kontsumoari dagokionez, eta baita A mailakoa ere, karbono dioxidoaren isuriei dagokienez.

Natura 2000 Sarearen barruan duen kokapena kontuan hartuta, eraikinak bere estalkian jasotako urak aprobetxatzen ditu, eta inguruan urmael txiki bat sortu da, «oro har faunarentzako eta bereziki anfibioentzako ur-putzu bat egokitzeko, Aralar mendilerroko KBEko funtsezko elementuetako bat baitira».

Aurkezpenean parte hartu dute Aralarko Aralar Elkarteko lehendakari eta Lakuntzako alkate Oihane Uribeetxebarriak, baita inguruko 19 toki entitate biltzen dituen eta Aralarren aprobetxamendu eskubideen titularra den eta Foru Gobernuarekin kudeaketa lanetan laguntzen duen erakunde honetako beste hainbat ordezkarik ere. Halaber, ekitaldian izan dira Ana Bretaña Ingurumeneko zuzendari nagusia eta Nafarroako Gobernuko Baso Zerbitzuko teknikariak ere.

Aralarko mendiak 2.164 hektareako azalera du Nafarroan, eta horietatik erdia baino gehiago zuhaitzak dira, pagadiak batez ere. Jarduera garrantzitsua du baso aprobetxamenduen arloan, urtero 2.500 eta 3.000 metro kubiko zur eta egur ateratzen baitira. Abeltzaintza jarduera esanguratsua da, 6.000 ardi, 250 behi eta 800 zaldi baino gehiagorekin. Gainera, Aralar bisitari eta mendizale ugari biltzen dituen eremua da, baita Natura 2000 Sarean kokatutako ingurumen balio handiko ingurunea ere.