BBVA, Kutxabank, Bankoa, CaixaBank, Laboral Kutxa eta Mapfre dira EAE-n autonomoentzako gizarte aurreikuspeneko planak kudeatuko dituzten erakundeak. Abendu honetan bertan merkaturatuko dira.

Noël d 'Anjou Ogasun eta Finantzetako Lakuako sailburuak, Olaia Arrieta Arabako Merkataritza Ganberako idazkari nagusiarekin eta José Antonio Zudaire eta Mauri Arregui Bilboko eta Gipuzkoako ganberetako presidenteekin batera, 160.000 pertsona inguru bezero izan ditzakeen gizarte-aurreikuspeneko eredu bat aurkeztu du asteazken honetan Bilbon.

Lakuak hitzarmen bat sinatu zuen 2023ko abenduan Araba, Bizkaia eta Gipuzkoako ganberekin, aurreikuspen eredu bat bultzatzeko, eta eredu horren zerga abantailak, nolanahi ere, foru ogasunetan garatzen ari den zerga berrikuspeneko prozesuari lotuta egongo dira.

Jakitera eman denaren arabera, egindako hautaketa prozesuaren ondoren, Bankoa Abanca, BBVA, Kutxabank, Laboral Kutxa, Mapfre eta VidaCaixa izango dira gizarte aurreikuspeneko tresna berriak kudeatuko dituztenak.

Abenduan zehar, merkatura

Planak abenduan zehar merkaturatuko dira, kasu gehienetan; izan ere, erakunderen batek ez du martxan jarriko 2025era arte. Aditzera eman denez, lehentasunezko enplegu planak izango dira, eta kudeatutako ondarearen % 0,5eko muga izango dute administrazio gastuetan. Erakunde kudeatzaile bakoitzak finkatuko du.

Langileak egiten dituen ekarpenei dagokienez, urterokoak izan beharko dute, eta erretiroa, heriotza, baliaezintasuna eta ezintasun iraunkorrari eragingo diote.

D 'Anjou sailburuak Gizarte Segurantzako sistema publikoak «babes sozialeko sarearen oinarrizko pieza» izaten jarraitu behar duela defendatu du, baina gaur aurkeztutakoa bezalako tresnak «indartzeko» beharraz ohartarazi du.

Azpimarratu duenez, autonomoen kolektiboaren Gizarte Segurantzako kotizazioak «historikoki baxuak» izan dira, eta, ondorioz, jasotzen dituzten pentsioak, batez beste, 1.150 eurokoak dira, eta besteren konturako langileek 2.003 eurokoak.

Zerga sistemaren berriskupena

Adibide gisa adierazi duenez, autonomo baten lan-bizitzan zehar ekarpen karrera batean soldataren % 6ko ekarpena egiteak erretiroan sistema publikotik lortzen den pentsioaren % 20 inguru ekar lezake.

Gainera, zerga sistemaren berrikuspenak, gaur egun informazio publikoaren fasean dagoenak, autonomoei «berariazko estaldura» ematea ahalbidetuko duela azpimarratu du. «Denborak esango du diseinatutako esparrua, proposatutako estimuluekin eta gertu dauden beste estimuluekin, nahikoa den ala ez», adierazi du.

Bestalde, Jose Ignacio Zudaire Bilboko Ganberako presidenteak azpimarratu duenez, ekimenak «langile autonomoen artean atzemandako defizit historikoari» aurre egitea du helburu; izan ere, 100 langiletik 16 ordezkatzen dituzte, % 40 emakumeak.