Azaroan Gasteizko udaltzaingoaren komisario izatetik kargugabetu zuten Marian Vidaurrek prebarikazio delitua egotzi dio Iñaki Gurtubai Arabako Foru Aldundiko diputatuari.

Gurtubai Hiritarren Segurtasuneko zinegotzia zenean, azaroan, Vidaurre kargugabetu zuen hau karguan lau hilabete eta lau egun izan ondoren. Orain, Vidaurrek bere aurkako akzio penalak hartzeko asmoa erakutsi zuen joan den ostegunean ELA sindikatuarekin egindako idazki batean.

Zehazki, EAJko zinegotziak kargugabetzeko erabili zituen argudioak «erabakia jokabide arbitrarioan bihurtzen duten faltsukerietan» oinarritzen direla esan zuen.

Kargugabetze hori argitzeko espresuki egindako udal-batzorde batean, Gurtubaik «lanpostu horretarako erabateko egokitasun falta» aipatu zuen, eta komisario ohia «prestasun-plusa jaso arren oporretan joan zela eta mugikorra 15 egunez itzali zuela» azaldu zuen.

Horren aurrean, Vidaurrek argudiatu zuen oporraldietan «funtzioak eskuordetzea formalizatzen» dela. Horrela, ordeskoak hartuko lituzke bere gain «komisario lanak, eta une oro egon behar du prest». Hala gertatu zen aurtengo abuztuko eta urriko oporretan.

«Zinegotziak ondo zekien prestasuna ez dela inoiz oporraldietara zabaltzen funtzioak eskuordetzen direnean», gaineratu zuen. Gainera, «beharrezkoa izan zenean telefonoz eta posta elektronikoz» harremanetan egon zela zehaztu zuen.

Gurtubaik bere «lantaldea sortzeko gaitasun falta» ere aipatu zuen, «lana bere mendekoengana bideratzeko joera» edo, lau hilabetetan «behin bakarrik deitu zidan, aurrekoak egunean lau aldiz».

Hautaketa-prozesua

Horrekin, komisario berria aukeratzeko hautaketa-prozesua deitoratu zuen eta «harrigarritzat» jo zuen. Zehazki, ‘deialdi honen xede den lanpostuaren aurreko lanpostu batean errebokatu ez izana, ezgaitasun-txostenetan oinarrituta’ dioen baldintzaren aurka egin zuen.

«Zentzugabekeria bat da, eta, horregatik, nire gaitasun profesionala publikoki eta faltsutasunez zalantzan jartzeaz gain, orain nire karrera profesionalean gora egiteko aukeratik kanpo uzten naute, nire buruari bakarrik aplika dakiokeen baldintza bat asmatuz», kritikatu zuen.