Binakako Txapelketako aurkezpenean, Martxel Iztuetak Lehen Mailakoekin debuta egingo zuela ikustean, beldur pixka bat sartuko zitzaion bati baino gehiagori. Egia da aurrean Lau eta Erdiko Txapelketa irabaztetik zetorren Unai Laso izango zuela, baina Binakako Txapelketa hain luze bati aurre egitea ez da edonolakoa. Hala ere, tolosarra, partidaz partida erakusten ari da bere bikotearekin oso ondo konpontzen dela. Eta azken emaitza hor dago: ostegun honetan, Azkoitian, orain arte bakarkako ziren liderrei irabazi diete, egurra emanda gainera (6-22).

Ezkurdia eta Rezusta dena irabaztetik zetozen Azkoitira, baina gaurkoan gutxi egin ahal izan dute Laso-Iztuetaren aurka. Eta hori Aspekoak 4-0 aurreratu direla. Baina Baikokoek buelta eman diote segituan markagailuari 0-9ko partzial bati esker (4-9).

Hortxe hasi da balantza aldatzen. Gorriek beste tanto bat egitea lortu dute 5-9koa ipintzeko, baina alferrikakoa izan da, ondoren urdinek 21eraino alde egin baitute. Beste tanto bat egiteko aukera izan dute Ezkurdia-Rezustak, baina garaipena Laso-Iztuetarentzat zen dudarik gabe, eta halaxe izan da.

Aipatzekoa da Unai Lasok sei tanto egin dituela sakez, eta honelako txapelketa batean oso garrantzitsua izaten da. Gainera, jokoan beste zortzi egin ditu nafarrak. Atzean, Iztuetak bi egindako eta beste bi galdutako izan ditu; zenbaki onak atzelari batentzat. 

Gauzak hala, zazpigarren jardunaldiari amaiera ematen zion neurketa hau ostean, Ezkurdia-Rezusta eta Laso-Iztueta berdinduta daude sailkapeneko goiko partean, seina punturekin. Ondoren dira Elordi-Zabaleta eta Artola-Mariezkurrena II.a, bostna garaipenekin; Jaka-Imazek hiru dituzte; Altuna III.a-Arangurenek bi; Peña II.-Albisuk bat; eta Peio Etxeberria-Martijak garaipenik gabe jarraitzen dute.

PARTIDAKO FITXA:

Ezkurdia-Rezusta: 6

Laso-Iztueta: 22

Pilotakadak: 396. Iraupena: 41 minutu. Markagailua: 4-0, 4-9, 5-9, 5-21, 6-21 eta 6-22. Sakez egindako tantoak: Ezkurdiak 2 eta Lasok 6. Jokoan egindako tantoak: Ezkurdiak 1, Rezustak 0, Lasok 8 eta Iztuetak 2. Galdutakoak: Ezkurdiak 4, Rezustak 2, Lasok 2 eta Iztuetak 2. Gertakariak: Giro eta sarrera ona Azkoitiko pilotalekuan Binakako Txapelketako partida hau jarraitzeko.