Euskal presoen eskubideen aldeko urteroko manifestazio nazionalerako lau egun falta diren honetan, horren arrazoiak azpimarratu eta mobilizazioaren beraren garapenaren nondik norakoak azaldu dituzte astearte honetan Bilboko La Bolsa eraikinean Joseba Azkarraga eta Bego Atxa Sareko bozeramaileek.

17.00etan hasiko da, La Casillan, eta, beste urte batzuetan bezala, Bilboko Udalean amaituko da. Hainbat alderdi, elkarte eta esparru geografiko, profesional eta kulturaletako pertsona ugarik iragarri dute manifestazioan parte hartuko dutela. Izan ere, hauek izango dira pankarta eramango dutenak: Rosa Rodero (ETAren biktima), Ane Muguruza (Estatu indarkeriaren biktima), Emilie Martin (Bake Bidea), Martxelo Otamendi (kazetaria), Garazi Hach Embarek (eskubideen aldeko eusko-saharar ekintzailea), Arantza Aldezabal (EHUko Irakaslea), Amaia Izko (abokatua), Eva Ferreira (Harrera), Patxi Bisquert (aktorea), Jose Luis Elkoro (Bergarako alkate ohia), Rafael Larretxea (senidea), Bego Atxa eta Joseba Azkarraga (Sare). ELA, LAB, ESK, Steilas, Hiru, EHNE, CGT, CNT eta Etxaldek osatzen duten euskal gehiengo sindikalak ere parte hartzeko deia egin du. Alderdien artean, EH Bildu, EH Bai, Junts, ERC, CUP eta Més Per Mallorca batu dira. Baita Bake Bidea, Egiari Zor, Gure Esku, Paz con Dignidad, Harrera, Etxerat, Ernai, ANC, Omnium Cultural eta Kataluniako abokatutzaren Koordinadora, besteak beste.

Horretaz gain, 450 eta 500 boluntario artean mobilizatuko ditu Sarek, manifestazioaren segurtasunaz, trafikoaz, diru eskeaz eta halako ekitaldi jendetsu batek dakarren guztiaz arduratzeko.

Giroa alaitzeko, goizetik eta, batez ere, Bilboko Alde Zaharrean, trikitilariak, dultzaineroak, erraldoiak eta buruhandiak izango dira. «Azken batean, aldarrikapena eta festa uztartu nahi ditugu», adierazi du Atxak.

«Ordua da»

Azkarragak mobilizazioa giza eskubideen aldeko aldarria izango dela gogorarazi du. «Ez gaude aldarrikapen politiko eta, beraz, alderdikoi baten aurrean. Mobilizazio hau presoen kolektibo baten eskubideen aldeko aldarria da, haien eskubideak urratzen jarraitzen baitute. Euskal presoen eskubideak berriz aldarrikatzea eta indarkeriaren biktima guztiei zor zaien errespetua eskatzea izango dira egun honetan bidelagun. Horrela bakarrik uler daiteke SARE bezalako elkarte batek, urtez urte, dozenaka mila pertsonak kaleak bete eta bidegabekeriarik gabeko bakea eskatzea», azaldu du bozeramaileak.

Izan ere, ‘Behin betiko’ izango da aurtengo mobilizazioaren leloa, «Behin betiko konponbidea» eman eta «bakean eta elkarbizitzan oinarritutako etorkizuna» eraikitzeko momentua dela aldarrikatuz.

«Ordua da. Konfrontazio eta sufrimenduaren hamarkadetako ondorio guztiak zigilatzeko garaia da, eta uste dugu euskal gizarteak zilegitasuna duela estamentu politiko eta judizialei lan horretan parte har dezaten eskatzeko. Bere erantzukizuna ere bada», adierazi du Azkarragak.

Azken hilabeteetan Sarek gogoratu duenez, ETAk bere jarduera amaitutzat eman zuela 13 urtera, oraindik ere 120 euskal preso inguru daude espetxean eta 20 euskal herritar inguru iheslari eta deportatu artean. «13 urteren ondoren salbuespen legeek indarrean jarraitzen dute, estrategia antiterroristapean bideratutako legeek herri honen konponbiderako hautua baldintzatzen jarraitzen dute», salatu du plataformak.

‘Bizumkada Nazionala’

Beste alde batetik, ‘Bizumkada Nazionala’ kanpaina ekonomikoa martxan jarri dutela iragarri dute gaurko prentsaurrekoan. Azaldu dutenez, Sare erakundeen diru-laguntza oso gutxirekin lan egiten duen elkartea da, eta sarekideen laguntzen eta antolatzen dituzten ekitaldi eta manifestazioetan egiten dituzten diru-eskeen bidez egiten du aurrera.

«Argi dago baliabideak behar ditugula gure lana egiten jarraitu ahal izateko, eta horregatik jartzen dugu martxan Bizumkada Nazionala (https://sare.eus/bizumkada) ekimena, euskal gizarteari gure lana egiten jarraitu ahal izateko beharrezkoa den laguntza ekonomikoa eskatzeko», argitu du Atxak.

Ekimen honekin edozein herritarrek lagundu ahal izango du, manifestazioan parte hartu edo ez, mobilizazioa baino egun batzuk lehenago eta ondoren ere aukera irekita egongo baita.