Igande honetan San Mamesen Athleticek Valladoliden aurka jokatuko duen partidan talde bilbotarreko kapitainak besoko bereizgarri ezberdin bat eramango du, hain zuzen FC Lorient Bretainiako talde historikoarekin elkarlanean egindakoa; ‘Les Merlus’-eko kapitainak besoko berbera eramango du Stade Lavalloisen aurka larunbat honetan Stade du Moustoirren.

Izan ere, besoko berezi honen diseinuak Ikurriña eta ‘Gwenn-ha-du’, Bretainiako bandera, uztartzen ditu. Biak erdian daude ‘K’ baten inguruan, ‘Kapitaina’ eta bretoierazko baliokidea den ‘Kabiten’ hitzen letra. Gainera, besokoak Lauburu bat dauka, zelten ikonografiari lotutako euskal ikur tradizionala, naturaren lau elementuak irudikatzen dituena (sua, ura, lurra eta airea), eta Triskel bat. Sinbolo zelta hau Bretainiako kultura eta nazio nortasunarekin oso lotuta dago eta esanahi desberdinak ditu, hala nola gorputzaren, adimenaren eta izpirituaren arteko oreka, eboluzioa eta hasiera eta amaiera.

Athletic eta FC Lorient taldeen ezkutuek osatzen dute diseinua, eta partidei buruzko informazioa ematen dute.

Ekimen hau FC Lorient taldeak abian jarritako kanpaina baten parte da. Bertan, denboraldi honetan etxean jokatzen duten partida bakoitzean bere kapitainak besoko pertsonalizatua darama, eta klubaren eta kultura bretoiaren historiako hainbat elementu ospatzen ditu. Esaterako, aurreko besokoek Bretainiako futbol amateurraren erreferentziak eta klubak hiriko itsas jarduerekin dituen lotura historikoak jaso dituzte.

Kasu honetan, Bretainiako klubak Athleticen atea jo zuen euskara eta Euskal Herria ohoratzen dituen besokoa garatzeko.

«Arnasa: gure lurraldeko nortasuna»

Besokoaz gain, Euskal Herriko eta Bretainiako kostaldea arnasaren bidez zeharkatzen duen bideo artistiko bat ere egin dute euren arteko loturak nabarmentzeko.«Arnasa: gure lurraldeko nortasuna» izenburupean, Bretainia, Euskal Herria, FC Lorient eta Athleticeko irudiak kontatzen dituzten kontalari euskaldunak eta bretoiak txandakatzen dira, tipografo baten jarduerarekin tartekatuta, ‘arnasa’ eta ‘c’hwezh’ hitzak hizkuntza bakoitzarekin zerikusia duten iturriekin margotuz.

FC Lorient, Frantziako Ligue 2-ko egungo liderra izateaz gain, Bretainiako kultura suspertzeko erreferente ere bada. 2019az geroztik, Bretainiako ‘Bro Gozh ma zadoù’ ereserkia partida bakoitza hasi baino lehen entzuten da Stade du Moustoirren, eta estadioko esatariak aldizka irakasten die bretoierazko hiztegia zaleei.

Gainera, 2024ko urtarrilean, FC Lorient bretoieraren karta (‘Ya d'ar brezhoneg’ – ‘Bai bretoierari’) sinatu zuen lehen futbol talde profesionala izan zen, eta Bretainia osoko gizarte zibilean hizkuntza horren eguneroko erabilera sustatzea du helburu (UNESCOk ‘arriskuan’ deritzon atalean sailkatu du bretotoera, izan ere).

Ekimen hau Athleticek bere webgunean dioenez, klubak «mundu mailan euskara eta euskal kultura sustatzeko duen konpromisoaren beste adibide bat» da. «Konpromiso hori adostasunaren emaitza da. (...) Nazioartekotze-proiektuaren barruan, ekimen hau aukera bikaina da konexio eta harreman berriak ezartzeko, Kluba agertoki globalean jarriz kultura eta hizkuntza gutxituen defendatzaile gisa».