EH Bildu, PSN, Geroa Bai eta Contigo-Zurekinek Iruñeko haur eskoletan euskarazko eskaintza 102 plazatan handitzeko akordioa erdietsi dute.

Ezker soberanistak «positibotzat» jo du akordioa, eta adierazi du eskaintzen den plaza kopurua «errealitatetik gertuago» dagoela eta haur eta lehen hezkuntzako eskoletan matrikulatzeko «benetako eskaerarekin bat» egiten duela. «Hainbat urtez Iruñeko gizartearen zati bat, euskara jazarriz eta zigortuz ikusezin bihurtu nahi izan duten politika euskarafobikoen ondoren, bideak irekitzeko borondateak batu ditugu», baieztatu du EHBilduk. «Haur-eskolen euskara-eskaintza auzo gehiagora zabaltzea eta orekatzea adostu dugu, hiritarren eskaera historikoari erantzunez; eta, horretarako, azken urteetan egin dugun bezala, desberdinen arteko elkarrizketa ezinbestekoa izan da».

Akordioari esker, ohar baten bidez jakinarazi dutenez, Printzearen Harresi eskolan 16 plaza gehiago egongo dira Arrosadian, lehendik zeuden 43 plazei gehituta, eta 46 plaza sortuko dira Mendebaldean, aurretik eskaintzarik ez zegoen lekuan. Guztira, euskarazko 58 plaza berri eskainiko ditu Udalak 2025-2026 ikasturterako. Gainera, euskarazko eskaintza beste auzo batera zabaltzen da, Ermitagaina auzora, lehen eredu horretan matrikulatzeko aukerarik ez zegoen zonalde batean. Donibane auzoko etorkizuneko eskolak ere, 43 plaza izango ditu euskaraz, eta horrek Iruñeko auzo guztietara eskaintza zabaltzen joateko bidean jarraitzen du. Horrela, euskaraz eskainiko diren plaza berriak 101 izango dira 2025-2026 eta 2026-2027 ikasturteetan.

EH Bilduk azpimarratu du «garrantzitsua» dela «euskarazko plazen zabalpena demandaren arabera handitzea», eskaintza orekatu ahal izateko, hiriko auzo guztietan modelo hori eskuratu ahal izateko. «Lanean jarraituko dugu hizkuntza-murgiltzea bermatuko duen haur-eskola eredu baten eta haurren garapena eta langileen lan-baldintzak lehenetsiko dituen proiektu pedagogiko bideragarri baten aldeko akordioak lortzeko», ziurtatu du.

Ildo beretik mintzatu da Geroa Bai. Mikel Armendariz Iruñeko Udalean Geroa Bairen bozeramaileak nabarmendu duenez, «poza agertu nahi dugu Iruñeko Haur eskoletan euskarazko plazek gora egin dutelako, hezkuntza etapa goiztiarrenean gure hizkuntzaren finkatzean eta normalizazioan aurrerapausoa dakarren neurria baita».

Zinegotziaren aburuz «hedapen honek familien eskaera geroz eta handiagoari erantzuten dio, bai eta haur guztiek, haien bizitzako lehen urteetatik hasita, euskarazko hezkuntza jasotzeko aukera bermatzeko beharrari ere».

Hala ere, Armendarizek dioenez, «ezarritako eredua ez da guztietan hoberena». «Benetako murgiltze linguistikoa bermatuko duen sistema baten alde egiten dugu, lingua navarroruma jasotzea eta erabat ezagutzea oztopatu dezaketen formula mistoak ekidinez», azaldu du. «Zentzu honetan, haur hezkuntzan euskararen presentzia sendotzeko modurik onena, komunikazio-hizkuntza euskara bakarrik duen eredu baten bitartez egitea dela deritzogu, modu horretan ikasketa solidoagoa eta naturalagoa ahalbidetuz», ziurtatu du zinegotziak.

PSN: «Errealitate soziolinguistikoaren eta familien aldarrikapenaren araberako eskaera»

Marina Curiel PSNren Iruñeko bozeramaileak «jantziak ez urratzeko» eskatu dio eskuinari, eta azpimarratu du horrela «errealitate soziolinguistikoaren eta familien aldarrikapenaren araberako eskaerari» erantzuten zaiola.

Azpimarratu duenez, akordio horren helburua «euskara hezkuntzan integratzen jarraitzea da», «beste aukera bat eskaintzea, erabilera alderdikoietan erori gabe, baizik eta aniztasunaren, aukeratzeko askatasunaren eta beti borondatezkoaren alde eginez».

Horren harira, bere alderdiak «hezkuntza publiko, inklusibo, plural eta elkarbizitzarako kalitatezkoarekin» duen konpromisoa azpimarratu du, eta «esparru horretan ezin dela bereizketarik egin, ez sexuen artean, ez hizkuntzen artean». Hori dela eta, adierazi duenez, «gobernu taldearekin akordio batera iritsi dira ikasturte berriaren eskaintzak bizikidetzan eta hizkuntzen arteko errespetuan oinarritutako ikuspegia izan dezan».

«Merkatu arauetan kokatutako erabakia»

Bestalde, Iruñeko Euskalgintza elkarteak gogorarazi duenez, gaur egun, Txantreako Izartegi Haur Eskola da Iruñean euskarazko murgiltze eredua duen bakarra. Eredu mistoa berriz, Goiz Ederren (Arrotxapea), Printzearen Harresin (Arrosadia), Lezkairun eta Hello Buztintxurin eskaintzen da.

Beraz, esan dutenez, akordioarekin Mendebaldea eta Donibane auzoetara zabalduko litzateke, baina murgiltze eredurik ez. Hori dela eta, «euskarazko benetako eredua eskaintzen duen Haur Eskola bakarrarekin jarraituko dugu, orain arte bezala», adierazi dute ohar batean. Gainera Donibanen sortzear dagoen Haur Eskolan ere euskarazko murgiltze eredua eskaintzeko aukera galdu dela deitoratu dute.

«Eskaintza eta merkatu arauetan kokatutako erabakia» da beraientzat, «oker handia». Izan ere, «administrazio publikoen egitekoa da parametro horietatik aldentzea, eta, horretarako, berebiziko garrantzia du auzo guztietan gutxiagotutako hizkuntza eskaintzeak»

PSNko Marina Curielek esandakoaren inguruan, berak aipatutako «errespetu linguistiko horretan euskara eta gaztelania ez daudela maila berean» esan dute. «Guk ere, Maria Curielek dioen moduan, uste dugu borroka politikotik aldendu behar dela hizkuntzaren eztabaida. Politika egokiak egin behar dira, haur eskolen arazoarekin hizkuntza politika egin behar da. Ez egitea ere politika da», gaineratu dute.