EH Bilduk III. Konferentzia Munizipalista egin du larunbat goiz honetan Azpeitiko Soreasu Antzokian. Harrera ekitaldian, Azpeitiko alkate eta Eudeleko lehendakariordea den Nagore Alkortak hartu du hitza. Alkortak alkateei eta haien taldeei eskerrak eman dizkie, EH Bilduren komunitate osoaren izenenean, haien bizilagunen ongizatea bermatzeko egiten ari diren lana dela-eta, eta fokua etxebizitza politiketan jarri du.

«Etxebizitzaren arazoa konpontzeko politika eraberritzaileak abian jarri behar ditugu. Eta guk, oztopoak, boikotak eta sortzen zaizkigun edozein arazoren gainetik, EH Bilduko alkateok etxebizitza eskubidea bermatzeko erabateko konpromisoa dugu». Eta zera gaineratu du: «EH Bilduko udalerriok aitzindariak gara hontan. Orereta-Errenteria izan da Euskal Herriko lehen udalerria gune tentsionatua izendatzen. Azpeitia ere aitzindaria izan da, etxebizitza hutsak mobilizatzeko programa martxan jarri dugulako; eta etorriko dira, bai udalerri eta bai neurri gehio EH Bilduren aldetik, guretzat etxebizitza lehentasuna delako», adierazi du.

Jarraian, Xabi Thicoiope EH Bairen udal politikarako arduradunaren bideoa emititu dute. Aurten lehen aldiz EH Bilduk eta EH Baik egun berean eta modu partekatuan egin dituzte haien udal konferentziak, lehenengoa EH Bairen kasuan. Beraz, Azpeitian eta Angelun garatu diren hitzorduetan, Euskal Herriko 7 herrialdeetako tokiko kargu publikoak, aldi berean, udal eta toki mailan garatu beharreko politika publikoak eztabaidatzen aritu dira.

Thicoiopek, Azpeitian bildutakoak agurtu ostean, adierazi du EH Baik I. Topaketa Munizipalistetan heldu den urteko herri hauteskundeak prestatu eta Euskal Hirigune Elkargoari buruz aritzeko baliatuko dituela. Azaldu duenez, goizean tailerrak antolatu dituzte udal esperientziak partekatzeko eta elkargoari buruz aritzeko, «burujabetzaren bidean urrats berri bat» emateari begira.

Jarraian, EH Bilduko hautetsiak lantaldetan gai ezberdinak jorratu dituzte eta, azkenik, III. Konferentzia Munizipalistari amaiera eman diote.