«Harrera sareak, mugimendu feministako kideak, auzo elkarteak, zaintza sareak, etxebizitzaren problematika lantzen dugun eragileak, politika migratzaileak salatzen ditugunak, antifaxistak, antiarrazitak, errolda eskubidea pertsona guztientzat aldarrikatzen dugunak, gure komunitateak eta auzoak maite eta bizi ditugunak gara. Eta gaur hemen gure auzoetako arazoei auzo elkartasun eta perspektiba integratzaile batetik lantzeko beharra azpimarratu nahi dugu».

Hala adierazi dute Gasteiz Anitza osatzen duten lagunek astelehen honetan udaletxearen aurrean egindako agerraldian. Bertan azaldu dutenez, «egoera zaurgarrian dauden pertsonekiko diskurtso baztertzaileak ohikoak bihurtu dira gure inguruan; hori gutxi ez balitz, azken hilabetetan gazteen kontrako diskurtso arrazistak biderkatu dira, beldurrak, estereotipo okerrak eta segurtasun ezaren aitzakipean. Beste kasu batzuetan ultra eskuina bere interes eta azpijokoekin mezu horiek hauspotzen ikusi dugu eta  arduragabekeria osoz astero  hainbat medioetan bide hori elikatzen dituzten berriak ikusten ditugu ere».

«Azken hilabeteetan egoera larrien aurrean soilik poliziaren esku hartze gehiago eskatzen duen  eta  eskubideen urraketei entzungor egiten dion ereduaren aurrean, beste eredu bat eraman nahi izan dugu praktikara. Eredu hori mahaiganean jartzeko beharra ikusten dugu eta horretara gatoz», gaineratu dute, «bizikidetza arazo larriak sortzen dituen egoera bat dagoela» aitortuz.

Santiago Hiribidean gertatutakoa

Hala, Santiago Hiribidean dagoen eraikin baten egoera aipatu dute. Gatazka sortu da auzokideen eta beheko lokala okupatu duten gazteen artean. «Kasu honetan, Judimendin, bizilagunen arteko elkarbizitza arazo honi perspektiba horretatik heldu nahi izan diogu. Etxebizitza blokean denbora bizitzen daramaten judimenditar eta lokalean bizitzen hasi diren judimenditarren arteko arazoak perspektiba eraikitzaile batetik begiratu, guztien beharrak kontutan hartu eta hauei erantzun bat ematea da, elkarbizitza arazoa konpontzeko bidean eman beharreko lehen pausoa», diote.

Eta pausuak eman dituztela esan dute: «Lehenengo urratsa, bizilagun guztien beharrak entzutea izan zen. Batzuen eta besteen beharrak, noski, oso desberdinak ziren. Bakoitzak bere egoera zuen baina azpimarratzekoa da elkarrizketa horiek izan ondoren, agerian geratu zela denon helburua eta ikuspegia berdina zela: guztiok merezi dugula bizi duin bat izateko baldintzak bermatuak izatea».

«Bigarren urratsa, baliabide instituzionalak bilatzea izan zen; tamalez, orain arte etekinik gabeko bilaketa izan da. Lokalean aurkitzen ziren gazteen egoera oso konplexua zen, bazterketa egoera batetik ateratzeko dauden zailtasunak gogor kolpatzen dute. Momentu zail horiei aurre egiteko, pazientzia, elkar-zaintza, akonpainamendua eta babesa beharrezko tresnak izan dira. Beste alde batetik, blokeko bizilagunek zituzten kezka eta zailtasunei erantzuna ematea ere ez da bat ere erraza izan», azpimarratu dute.

Baina, beraien esanetan, «egoera guztiz kaskartzeko, etorri zen lokaleko argi mozketa», eta horren ondorioz izan diren segurtasun arazoak. «Horrek lortu duen gauza bakarra da, duintasunez bizitzeko beharrezko baldintza apurrak guztiz deuseztatzea. Gauzak horrela, kudeaketarako zailtasunak areagotu, eta urduritasuna eta kezkak biderkatu ziren. Hori guztia gutxi balitz, zenbait mediok eta eskuineko alderdiek, putreak egiten duten antzera, beraien unea iritsia zela ondorioztatu zuten».

Diotenez, «momentu honetan, Judimendira orain dela gutxi iritsi diren gazteen egoera zaurgarria izaten jarraitzen duen arren, haien bidea duintasunez jarraitzeko bultzada eta babesa jaso dute. Hori dela eta ondoriozta dezakegu elkarbizitza arazoa amaitzeko bidea hartu duela. Auzokideon arteko antolaketa eta elkartasunari esker kudeaketa desberdin eta arrakastatsu baten bidea ireki da. Bide hau elkarrekin urratu dugu, era komunitarioan. Finean, sareak jostea eta elkarren arteko elkarrizketak hainbat arazori irtenbidea emateko baliagarria izan da. Baina batez ere, elkar ezagutzeko eta besteen arazoekin enpatizatzeko aukera paregabea eman digu».

Amaitzeko, Gasteizko erakundeei eta gizarte eragile guztiei eskatu diete «konpromisoetatik harago, gatazken kudeaketa positiboarekin, gizarte kohesioarekin, diskriminazio, kalteberatasun, segregazio eta gizarte bazterketako egoeren prebentzioarekin, kulturartekotasunarekin eta bizi eta elkarrekin bizi nahi dugun hiriaren sorreran ardurak har ditzagun herritar guztien parte hartzea sustatuz eta bermatuz».