Gnat Zinemaren V. edizioa, Gipuzkoako Natura eta Ingurumen Zinemaren Erakusketa, astelehen honetan inauguratu da Kursaalean, ‘Kantauri’ dokumentalaren estreinaldiarekin.

Gipuzkoako Foru Aldundiak ohar batean azaldu duenez, Xabier Minak eta Isaias Cruzek zuzendutako dokumentala da, ikuslea Kantauri itsasoko biodibertsitatean murgiltzen duena, kalitate handiko itsaspeko irudien eta narratiba poetikoaren bidez.

Filma proiektatu ondoren, ikusleek mintzaldi bat egin ahal izan dute dokumentalaren sortzaileekin. Hitzaldian parte hartu dute Mina eta Cruz zuzendariek, Beatriz Iso gidoilariak, Patxi Zubizarreta narrazioaren idazleak eta Joseba Beristain soinu-bandaren konpositoreak.

Elkarrizketan zehar, filmazio-prozesuari, ur sakonetan grabatzeko erronkei eta zinemaren bidez ingurumen-sentsibilizazioaren garrantziari buruzko xehetasunak partekatu dira. Xabier Minak, itsas biologoak ere, Kantauriko edertasuna eta hauskortasuna harrapatzeko ahalegina nabarmendu du, urpeko filmazio-teknika aurreratuen bidez hartutako bereizmen handiko irudiekin.

Aurkezpenean, Jose Ignacio Asensio Jasangarritasuneko diputatuak Gnat Zinemaren garrantzia nabarmendu du, zinemaren bidez ingurumenaren zaintzaz kontzientziatzeko plataforma gisa: «Gnat Zinemak kalitate handiko zinema batez gozatzeko aukera ematen du, eta, aldi berean, gure ingurunea babesteko beharrari buruz hausnartzeko gonbita egiten du. Klima-larrialdia erronka saihestezina den une honetan, funtsezkoa da istorio horiek jendearengana hurbiltzea eta irtenbide jasangarriak inspiratuko dituen eztabaida sustatzea».

Hurrengo proiekzioak

Kantauri dokumentalaren inaugurazioaren ondoren, Gnat Zinemaren programazioak hainbat proiekzio eta jarduerarekin jarraituko du. Martxoak 26an, Donostiako Aquariumean ‘Gringo Trailsen’ aurkeztuko da. Turismoak ingurune naturaletan duen inpaktuari buruzko dokumentalada, eta, ondoren, eztabaida bat izango da jasangarritasunaren eta lurralde-plangintzaren arloko adituekin.

Martxoaren 27an Tolosako TOPICean, ‘Fauna Ibérica’ proiektatuko da. Penintsulako basabizitzaren dibertsitatea aztertzen duen dokumentala, eta Alberto Redondo zuzendaria bertan izango da. Martxoaren 28an Gnat Zinemaren V. Edizioa txiera egingo da Tolosan, ‘Territory’ filmarekin. Komunitate indigenek beren lurraldeen defentsaren alde duten borrokari buruzko dokumentala da. Proiektatu ondoren Alex Galan errealizadorearen hitzaldi bat antolatuko da.

Saio guztiak doakoak eta jendearentzat irekiak dira, eta sarrerak webgune honetan daude eskuragarri.