aZientzialari eta zientziazaleez gain, herritar ugari jarri dira zeruari begira larunbat honetan, ipar hemisferioan ikusi ahal izan den eguzki eklipse partziala jarraitzeko. Euskal Herrian ere antolatu dira ekitaldiak ilargia Lurraren eta Eguzkiaren parean nola jartzen zen behatzeko.

Goizeko 11.00etarako minutu batzuk falta zirela hasi da gurean eta 12.40 aldera bukatu da. Leku askotan hodeiek ezinezko egin dute eklipsea jarraitzea, baina beste askotan, aldiz, fenomeno honekin gozatu ahal izan dute.

Aranzadi Zientzia Elkarteak Zorroagan (Donostia) antolatu du eklipsea jarraitzeko hitzordua –300 pertsona inguru elkartu dira– eta Iruñeko Planetarioaren aurrean ere jarri dira zerura begira, Nafarroako Astronomia Elkarteak eta Astronavarra sareak deitua.

Datozen urteotan beste eklipse batzuk ere ikusiko dira. Bereziki nabarmentzekoa izango da 2026ko abuztuaren 12koa, hura eguzki eklipse osoa izango baita. Euskal Herritik, fenomenoaren zatirik handiena behatu ahal izango da, eta astronomoak dagoeneko ari dira prestaketa lanetan.

Halako eklipseen behaketak hainbat babes neurri hartzea eskatzen du, eguzkiaren argi bizia zuzenean begiratzeak begietako lesio larriak eragin baititzake. Horregatik, funtsezkoa da betaurreko egokiak erabiltzea, ondo kontserbatuta eta inolako akatsik gabe.

Astronomoek ohartarazi dute babesik gabe edo tresna desegokiekin egindako behaketak kalte iraunkorrak sor ditzakeela ikusmenean.

Hala, larunbat honetako eklipse partzialarekin gozatu dutenek zein arrazoi bat edo bestearengatik ikusi ezin izan duten zale zein adituek badituzte antzerako fenomenoekin beste hitzordu batzuk.