Espetxean hamarkada asko daramatzaten eta salbuespen egoeran dauden presoen errealitateak espetxeetako auziaren konponbidea «oztopatzen» duela uste dute Sarek eta Etxeratek. Hori ikusarazteko, ekimen berezia egingo dute maiatzaren 17an eta 18an.

Hala jakinarazi dute martxoko azken ostiralean egindako mobilizazioetan. Guztira 3.400 lagun batu dira dozenaka herri eta hiritan.

«Etxeko lanen zati handi bat eginda» dagoela onartu badute ere, «pentsatu beharko dugu nola heldu espetxeen auziko azken fasea izan behar duenari eta, horrekin batera, gure herrian jasandako indarkeriaren biktima guztientzako tratamendu duina eta begirunezkoa ekarriko duen akordio bat lortzeko beharra» dagoela adierazi dute Saretik.

«Azken denboran aurrerapenen lekuko izan garela» esan dute. Aurrerapenak «guk pentsatu genuena baino mantsoago» gertatu direla deitoratzen badute ere, azken hiru urteetan eman den «bultzada handia» nabarmendu dute.

Gogorarazi dutenez, «ezin dugu bakeaz, adiskidetzaz eta elkarbizitzaz hitz egin legea eta espetxe erreglamenduak aplikatuz gero aske egon beharko lukeen preso bakar bat ere kartzelan uzten bada». Horren aurrean, beraien egitekoa «jendearen aktibazioa» dela esan dute.

«Gaur egun, preso asko, hirugarren graduan edo 100.2 artikuluaren bitartez, espetxetik goiz-goizetik atera eta gauean itzultzen dira, boluntario lana edo lan ordaindua egin ondoren; badira ere baldintzapean aske daudenak edo erdi askatasunaren araubidean», azaldu dute.

Errenterian, gainera, Asanblada Feministarekin batera egin zuten elkarretaratzea iluntzean preso dauden emakumeen «zigor hirukoitza: soziala, pertsonala eta penala» pairatzen dutela salatzeko. Bilboko mobilizazioan, gaixorik dagoen Gotzon Telleria presoaren aldeko aldarriak ikusi ahal izan ziren, ‘Gotzon SOS’ lelopean.

«Puzzlea osatu arte»

Presoen auziari «konponbidea emateko falta dena» ikusarazteko, «puzlea osatu arte», maiatzaren erdian egingo den ekimen bat oraindik salbuespen egoeran dauden presoak dituzten herrietatik igaroko da. Datozen asteetan emango dute ekimenari buruzko informazio zehatzagoa.

«Badakigu zein den aurrera egiteko bidea: orain arte bezala, ekin, ekin eta ekin», adierazi dute irmoki. «Jarrai dezagun euskal preso, iheslari eta deportatu guztien behin betiko etxeratzearen aldeko lanean, gertuago gaude, lortuko dugu!», gaineratu dute.