Australian oilarrak jotako kukurrukua Euskal herrian ere aditu da. Alegia, Aitor Francesena ‘Gallo’ surflari zarauztarrak itsuen kategorian Australian jokatu den AASP zirkuituko proba irabazi du. Gipuzkoar surflari beteranoak abisua eman zuen Australiara abiatu aurretik. Fisikoki oso ondo zegoen, aldakako arazoak atzean utzita, eta uretan egindako lanak esandakoa berretsi du.

Surflari itsuen kategoriako lehen sailkapen-jardunaldia gainditu ondoren, Francesenak ingurua ondo baino hobeto ezagutzen duten bi surflari australiarrekin neurtu behar izan ditu indarrak: Kirk Watson eta Steven Fox. Aitorrek laster hartu du 5.33ko olatua, eta 3.83ko beste bat surfeatu ostean, ezin bere aurkariek bere parera iritsi. Gipuzkoarra 9.16 punturekin gailendu da, Steven Foxen (6.54) eta Kirk Watsonen (4.37) aurretik.

Horrela hasi du Aitorrek, emaitza paregabearekin, 2025eko AASP zirkuitua. Lehenengo proba Byron Bayn (Australia) egin da, bigarrena Waikikin (Hawai) jokatuko dute maiatzaren 15etik 19ra eta hirugarrena irailaren 4tik 7ra Oceansiden (Kalifornia).

Gogoan izan behar da Aitor Francesena Munduko txapeldun izan zela bi aldiz 2023an. Urte horretan Adaptive Surfing Professionals World Championship zirkuitua eta AMP Surf (Surflari Anputatuen Elkartea) zirkuitua irabazi zituen, azken hau Surf Leaguerako sortzaileen eta Nazioarteko Surf Elkartearen (ISA) berme eta estandarrekin. Gainera, Europako Parasurfing txapelketako garaile izan zen ere.

Ero baten arrakasta

Glaukoma diagnostikatu zioten Francesenari 14 urte zituela, eta eskuineko begia galdu zuen, ebakuntza askoren ondoren. Hala ere, surfa praktikatzeari ez dio inoiz utzi, bere bizimodua bihurtu duen arte.

Beti izan da aitzindaria. Euskal Herriko aurreneko eskola ireki zuen 1988an, Zarautzen eta lehenengo surf entrenatzaile ere bihurtu zen, eta bere irakaskuntza-metodoa oraindik ere ia eskola guztietan erabiltzen da. Aritz Aranburu, Mario Azurza edo Axier Muniain entrenatu ditu, besteak beste.

2012an olatu handi batek bere kontra jo zuen eta ezkerreko begia txikitu zion, erabat itsu geratuz. Ospitaletik irten eta hiru hilabetera, ordea, surfean hasi zen berriro. Ohol zabalekin eta olatu txikiekin hasi zen, gero ohol estu eta handiagoetara pasatzeko. Bizitako guztiak ez dio eragotzi hobetzen eta itsasoaz gozatzen jarraitzea, bost aldiz Munduko txapeldun izatera eta beste maila askotan titulu ugari eskuratzera iritsi arte.