Astearte arratsalde honetan banatu dute 2024ko Emakunde Saria; aurten bi elkarte izan dira oroitarria jaso dutenak: AMUGE EAEko Emakume Ijitoak Sustatzeko eta Ahalduntzeko Kulturarteko Elkartea eta IMME Emakume Musulmanak Euskal Gizartean Integratzeko Elkartea. «Emakume ijito eta musulmanek bizi duten diskriminazioa ikusarazteko lana» saritu dutela adierazi du Emakundek.

Epaimahaiak bi hautagaitzen izaera kolektiboa eta emakume ijitoek eta emakume musulmanek bizi dituzten diskriminazio mota anitzak ikusarazteko eta hauek artatzeko egindako lana baloratu dute. AMUGE taldeko Tamara Claveriaren alabak (osasun arazoengatik ezin izan du ekitaldira bertaratu) eta IMME elkarteko Djamila Zereibek jaso dute saria.

Claveriak bideo baten bidez adierazi du emakume ijitoekiko diskriminazio «historiko eta sakonak» daudela, eta neurririk hartu ezean ikuspegi hori «betikotzeko arriskua» jarri du mahai gainean. «Historia, duintasuna eta erresistentzia dituen herri batean, sari honek hainbeste borrokatu duten emakume ijitoen kolektiboa duintzen du», gehitu du alabak Ijitoen Nazioarteko eguna dela aldarri eginez.

AMUGEk hogei urte baino gehiagoko lana egin du emakume ijitoekin ahalduntzeko programetan, baita gizonekin ere: 2015etik laurogeita hamasei gizon igaro dira berdintasun tailerretan.

Djamila Zereib duela hamahiru urte jaio zen IMMEren sortzaileak azaldu duenez, elkarte honek «lur honetako kide ziren emakume musulman askoren nahiari erantzuten dio».

Elkarteak emakume musulmanen ahalduntze ekonomikoaren alde lan egiten du, lan trebetasunetan gaitzen baititu, baita indarkeria matxistari buruzko sentsibilizazio proiektuetan ere. Haurrekin ere egiten dute lan, «oztopo ikusezinak» gainditzeko hezkuntzan.

Ikuspegi intersekzionala

Miren Elgarresta Emakundeko zuzendariak azaldu du saritutako bi elkarteek ikuspegi intersekzionala lantzen dutela eta begirada hori «inspiratzailea» dela «interbentzio publikorako». Hala adierazi du: «AMUGEk eta IMMEk izaera kolektiboa eta begirada intersekzionala dute, emakumeek bizi dituzten kalteberatasun anitzak deskribatzeko beharrezkoa dena. Bi elkarteek argi eta garbi erakusten digute emakumeak ezin garela kategoria homogeneo batean sartu».

Lakuako Gobernuko lehendakari Imanol Pradalesek ere elkarte hauek egiten dute lana txalotu du eta emakumeei «bizitza hobe» bat eskaintzen dietela nabarmendu: «Desberdintasuna moteltzen duen sare sozial bat eskaintzen duzue, baita emakumeen ahotsa benetan entzuteko tresnak ere».