Eibar Memoria Toki izendatuko du Gobernu espainolak, 1931ko apirilaren 14an Bigarren Errepublika aldarrikatu zuen Estatuko lehena izateagatik eta 36ko gerran jasan zituen bonbardaketa tragikoengatik.

Hala iragari du Fernando Martinez Memoria Demokratikoko Estatu idazkariak, astelehen honetan, Bigarren Errepublikaren aldarrikapenaren urteurrenarekin bat eginez, Eibarren egindako ekitaldi batean. Bertan baieztatu duenez, Gobernu espainolak Eibarko Udalaren proposamena jaso du, hiria Memoria Leku izendatzeko.

Estatu idazkariak baieztatu duenez, izendapen hori Eibarrek zein Untzaga plazak jasoko dute. Bertan, duela 94 urte bezala, Bigarren Errepublika aldarrikatu zen udaletxeko balkoietatik.

Hortaz, Eibarko Untzaga plaza, historikoki herriaren bihotz politiko eta soziala izan dena, Memoria Demokratikoko Lekuen Estatuko Inbentarioan sartuko da, eta horrek esan nahi du Udala behartuta egongo dela haren kontserbazioa, seinaleztapena eta interpretazio historikoa bermatzera.

Apirilaren 14a, askatasunaren sinbolo

Fernando Martinekin batera, Marisol Garmendia Gobernu espainolak EAEn duen ordezkaria, Maria Jesus San Jose Lakuako Gobernuko Justizia sailburua eta Jon Iraola Eibarko alkatea izan dira ekitaldian.

San Josek apirilaren 14a aldarrikatu du askatasunaren eta bizikidetzaren sinbolo gisa, eta harro agertu da hiriko zinegotziak 1931ko udalbatza hartan herritarrek askatasunez eta demokratikoki aukeratutako errepublika bati baldintzarik gabe atxiki zirelako.

«Gorrotoaren, xenofobiaren eta polarizazioaren berpizteak» markatutako nazioarteko testuinguru batean, San Josek une historiko hura inspiratu zuten «errepublikanismo zibikoaren» balioak nabarmendu ditu: «Herritartasun inklusibo eta demokratikoa, non kredoa, hizkuntza, ideiak, arraza, sexua edo generoa ez diren axola».

Sailburuak gogorarazi du demokrazia eta askatasuna ez direla emandako eskubideak, baizik eta lorpen sozialak, ahalegin kolektiboaren ondorio direnak. «Ez ziren beti existitu, eta, horregatik, erne egon behar dugu: beti gaude horiek kentzen saiatzeko arriskuan. Balio horien alde borrokatu dira milioika pertsona, eta bizitza eman dute», azpimarratu du.

Eibarko alkate Jon Iraolak, bere aldetik, esan du herriaren errekonozimendu hori urrats garrantzitsua dela memoria kolektiboa babesteko.

Bere ustez, merezitako aitorpena da hiriarentzat eta balio demokratikoak defendatu zituzten pertsona guztientzat.