Joan den abenduaren 3an EH Bilduk proposamen bat aurkeztu zion udalbatzako osoko bilkurari, Ermuko etxebizitzaren benetako premiei buruzko diagnosi bat egiteko. Hauek dira, batez ere, ekimen hau proposatzera bultzatzen gaituzten arrazoiak:

Jakin badakigu Etxebide-ri Ermuan alokairu babestuaren eskaerak 400 baino gehiago direla, eta alokairuaren merkatu librea, Ermuan ere, bizitegi-prekaritate onartezin baterantz kanporatzen ari dela pertsona kopuru handi bat, eta soldatek ez dutela hipoteka bat eskatzeko adina aurrezten uzten. Beraz, etxebizitza partekatu behar duten pertsonen kopuruak gora egiten jarraitzen du.

Etxebizitzaren benetako premien diagnosia egiteko beharra adierazteaz gain, proposamen sorta bat planteatzen dugu, irtenbide posibleak formulatzeko. Gure asmoa da lankidetza giroa sortzea jabeen, etxebizitza eskatzaileen, Udalaren eta beste administrazio batzuen artean, arazoari modu integralean aurre egitea. Birgaitzeko laguntzak proposatzea. Bigarren eskuko etxebizitza erosteko berme publikoak. Era berean, Udalak alokairu sozialeko udal etxebizitza izateko baliabideak erabiltzea, Gure-etxea eraikinetik hasita (Guardia Zibilaren kuartel-etxe zaharra).

Badakigu ez dugula ezer berririk asmatu nahi, hori guztia beste leku batzuetan egiten ari baita, baina Ermuan ez bezala, lurzorua urria da eta horrek etxebizitza politika baldintzatzen du, eta arreta berezia jarri behar diogu gaur egun dagoen etxebizitza parkeari.

Harrigarria bada ere, PSOE-EAJk eta PPk mozioaren aurka bozkatu dute, eta postureotzat jo dute. Osoko bilkuran, PSOEko bozeramaile Juan Carlos Abascalek adierazi zuen etxebizitza, zalantzarik gabe, premia bat dela, eta azaldu zuen «herri honetako hiri eraldaketa eredugarria izan delako eta etxeko lanak egin dituztelako, ez dela beharrezkoa diagnosi hori egitea». Adierazi zuen «zuzkidura-bizitokiak txandakako irtenbide zoragarria» direla, eta aitortu zuen Betiondokoak epe ertain-luzera egingo direla. Azkenik, onartu zuen «Ermua etorkizunean tentsionatutako udalerrietako bat izan daitekeela». Hori guztia onartuta ere, gure proposamena ez da kontuan hartu.