Gardentasun falta, Ertzaintzaren marka

Otsailaren 1ean Ertzaintzak Donostiako diskoteka baten irteeran gertatu zen istilu batean esku hartu zuen. Inplikatuetako baten bikotekidea, Karen Daniela Agredo, konorterik gabe geratu zen Ertzaintzaren jipoi bortitz baten ondorioz, lekukoek adierazi dutenez. Egoera horretan egon arren, emakumea zortzi orduz egon zen  komisarian –ez dago argi atxilotuta zegoen ala ez– Donostia Ospitalera eraman aurretik. Osasun zentroan zuzenean ZIUan sartu zuten. Horrek erakusten du zein egoera tamalgarrian iritsi zen. Senide baten testigantzaren arabera, sekuela larriak ditu. Gaur egun, emakumeak paralizatuta dauka ezkerreko aldea, ezin du beso bat mugitu, oreka galtzen du eta begia oker gelditu zaio. Gertatutakoaren larritasuna gorabehera, ez da deus jakin familiakoek kasua salatu duten arte.

Segurtasun Sailak atzo baieztatu zuen gertakarien berri duela, barne-ikerketa bat egiten ari dela eta Kontrol Batzordeari helarazi zaiola. Ez dirudi herritarrei gertatutakoaren berri ematea bere kezken artean dagoenik. Gardentasun falta hori errepikatzen da Ertzaintzaren esku-hartze batek ondorio larriak dituen bakoitzean. Duela urtebete Astigarragan Ertzaintzak egindako beste jarduera bat dakar gogora kasuak. Orduan, gazte batek, Eneko Valdesek, laguntza eskatu zuen agerraldi psikotiko baten ondorioz, eta hilda amaitu zuen Ertzaintzak esku hartu ondoren. Orduan ere ez zen ezer jakin hilabete eta erdi igaro arte. Aurten kontua errepikatu egin da, nahiz eta Ertzaintzaren arduradun politikoak beste batzuk izan. Arduradunak aldatzen dira, baina gardentasunik ezak bere horretan jarraitzen du, Ertzaintzaren jarduteko moduaren ezaugarri. Eta gardentasunik gabe ezin dira kontuak eman, ezin dira botere-abusuak zuzendu, ezta arrisku handirik ez dakarten egoeretan basakeria zuzendu ere.

Gardentasun arazo bat dago Segurtasun Sailean, baina Ertzaintzaren jarduera-protokoloekin ere arazo larri bat dago. Bestela, ez da ulertzen horrelako egoerak horrelako indarkeriarik gabe bideratu ezin izatea. Azalpenak behar ditu jendarteak, baina egoera zuzentzeko neurri zehatzak ere bai.

Bilatu